Erlan Qarın Qazaqstannyń BUU-nyń Adam quqyqtary keńesiniń quramyna kirýine qatysty pikir bildirdi

NUR-SULTAN. QazAqparat – QR Prezıdentiniń kómekshisi Erlan Qarın elimizdiń BUU-nyń Adam quqyqtary jónindegi keńesiniń quramyna kirýine qatysty pikir bildirdi, dep habarlaıdy QazAqparat tilshisi.

«14 qazanda BUU Bas assambleıasynyń sheshimimen Qazaqstan 2022-2024 jyldary BUU-nyń Adam quqyqtary jónindegi keńesiniń quramyna kirdi. Atalǵan keńeske Qazaqstannyń múshe bolyp saılanýy – quqyq qorǵaýshylarymyz ben memlekettiń adam quqyǵyn qorǵaý salasynda kúsh-jigerin moıyndaýy. Qazaqstan kandıdatýrasyn qaraý barysynda Prezıdent Qasym-Jomart Toqaevtyń Joldaýlary men Jarlyqtarynda belgilegen, qabyldanyp jatqan barlyq is-sharalar eskerildi. Memleket basshysynyń ótken jylǵy jáne osy jolǵy Joldaýlarynda quqyq qorǵaý taqyryby jeke bólim boldy. Al osy jyldyń maýsymynda Prezıdent quqyq qorǵaý salasyn keshendi jańǵyrtýǵa baǵyttalǵan «Qazaqstan Respýblıkasynyń adam quqyqtary salasyndaǵy jekelegen is-sharalary týraly» Jarlyqqa qol qoıdy», - dep jazdy Erlan Qarın Telegram kanalynda.

Onyń atap ótýinshe, Qazaqstanyń BUU Adam quqyqtary jónindegi keńesiniń jumysyna qatysýy memlekettiń munan ary da quqyq qorǵaý máselelerine nazar aýdara otyryp, adam quqyqtaryn qorǵaý salasyndaǵy ózge de kóptegen problemany munan ary ózektendirip, sheshýge septigin tıgizedi.