Erlan Qarın Qazaqstanǵa jańa Konstıtýtsııa ne úshin qajet ekenin aıtty
ASTANA. KAZINFORM – Qazaqstanda talqylanyp jatqan Konstıtýtsııa mátini bolashaǵyna zor senimmen qaraıtyn, ózindik ambıtsııasy bar Qazaqstanyń Konstıtýtsııasy bolýy kerek. Bul pikirdi Memlekettik keńesshi – Konstıtýtsııalyq komıssııa tóraǵasynyń orynbasary Erlan Qarın aıtty.
Óz sózinde E. Qarın sarapshylar men zańgerler biraz ýaqyttan beri eskirgen termınologııalyq apparatqa qatysty máseleni kóterip júrgenin aıtty. Sebebi qoldanystaǵy Konstıtýtsııa 1995 jyly keńestik dáýirden endi shyqqan kezdegi jaǵdaıda, sol dáýirdiń termınologııalyq apparatymen, sol kezdegi leksıkamen, sol ýaqyttyń rıtorıkasymen jazyldy.
− Aıtalyq, kezinde qoldanylǵan memlekettik qaýipsizdik, telegraf, tektik, toptyq arazdyq jáne basqa termınder − búginde ashyq anahronızm. Sebebi Qazaqstan búgin múldem basqa jaǵdaıda ómir súrip jatyr. Qazirgi qoldanystaǵy Konstıtýtsııa keńestik kezeńnen endi ǵana bosap, Táýelsizdigimizdi endi ǵana alyp, egemendigimizdi endi ǵana qalyptastyryp, shet memlekettermen endi ǵana qarym-qatynas ornatyp jatqan eleń-alań shaqta qabyldandy, − dedi Memlekettik keńesshi Konstıtýtsııalyq komıssııanyń besinshi otyrysynda.
Bul rette eshkim de qoldanystaǵy Konstıtýtsııanyń memlekettilikti qalyptastyrýdaǵy, tarıhı damýymyzdaǵy mańyzdy rólin, tıgizgen oń áseri men yqpalyn joqqa shyǵaryp otyrmaǵany aıryqsha aıtyldy.
− Kerisinshe qazirgi Konstıtýtsııa osy ýaqyt aralyǵynda elimizdiń damýyna úlken serpin berdi, osy kúnge deıin qol jetkizgen jetistikterge negiz boldy. Muny erteń eshkim burmalamaýy úshin ádeıi aıtyp otyrmyn. Degenmen biz talqylap otyrǵan jańa Konstıtýtsııanyń máni, mátini memlekettiligi ábden ornyqqan, halyqaralyq keńistikte bedeli qalyptasqan, adamı kapıtalǵa, bilim men ǵylymǵa, ınnovatsııaǵa basymdyq beretin, bolashaǵyna zor senimmen qaraıtyn, ózindik ambıtsııasy bar Qazaqstan Konstıtýtsııasy bolýy kerek dep oılaımyn. Bir sózben aıtqanda bul bolashaqqa bet burǵan, aýqymdy jospary bar eldiń Konstıtýtsııasy bolýy kerek dep oılaımyn, − dep túıindedi Erlan Qarın.
Osyǵan deıin Erlan Qarın Konstıtýtsııanyń basty erekshelikteriniń biri adam quqyqtaryna baǵdarlaýynda ekendigin atap ótti.