Erlan Qarın: Qazaqstandaǵy ózgeristerdiń mańyzdy jáne jarqyn kórsetkishi – naqty pikir plıýralızmi
ASTANA. KAZINFORM – QR Memlekettik keńesshisi Erlan Qarın Qazaqstanda júrgizilgen ınstıtýtsıonaldyq reformalardyń arqasynda jańa teńdestirilgen bılik júıesi qalyptasqanyn aıtty.
Aıtýynsha, sonyń aıasynda Parlamenttiń yqpaly aıtarlyqtaı ulǵaıyp, Úkimettiń jaýapkershiligi artty, Konstıtýtsııalyq Sot quryldy.
«Keshe Memleket basshysy BAQ qyzmetkerleri kúni qarsańynda sóz sóılep, jalpyulttyq deńgeıdegi aýqymdy máselelerge qatysty pikir bildirdi. Qazaqstannyń kópten beri jańa saıası ahýalda ómir súrip jatqany týraly aıtty. Muny eń basty tezıstiń biri deýge bolady. Sońǵy bes jylda elimizde aýqymdy ári túbegeıli ózgerister boldy. Qazaqstanda júrgizilgen ınstıtýtsıonaldyq reformalardyń arqasynda jańa teńdestirilgen bılik júıesi qalyptasty. Sonyń aıasynda Parlamenttiń yqpaly aıtarlyqtaı ulǵaıyp, Úkimettiń jaýapkershiligi artty, Konstıtýtsııalyq Sot quryldy. Azamattardyń áleýmettik belsendiligi men saıası mádenıetiniń artýy – jańa saıası ahýaldyń aıqyn kórinisi. Memleket azamattardyń óz ustanymdaryn erkin jáne ashyq bildirýi, sheshim qabyldaý úderisine belsendi qatysýy úshin úlken qadamdar jasady, jasaı beredi de. Sonyń arqasynda búginde biz saıası jáne áleýmettik mádenıette syndarly dıalog, demokratııa jáne konstrýktıvızm qaǵıdattaryna negizdelgen múlde jańa normalar men standarttardy qalyptastyrdyq. Qazaqstandaǵy ózgeristerdiń mańyzdy jáne jarqyn kórsetkishi – naqty pikir plıýralızmi. Qoǵamdyq ómirdiń ajyramas bóligine aınalǵan sóz bostandyǵy qazirdiń ózinde qalypty jaǵdaı sanalady. Bul eń áýeli Prezıdent usynǵan «ártúrli pikir – birtutas ult» qaǵıdasynyń arqasynda múmkin bolyp otyr. Jalpy, Memleket basshysynyń bul sózinde Ádiletti Qazaqstan qurý baǵytynyń ózgermeıtindigi, bastalǵan keshendi reformalardyń keri qaıtpaıtyndyǵy jáne bul úderistegi qoǵam men azamattardyń róli aıryqsha ekendigi týraly mańyzdy messedjder bar», - dep jazdy Erlan Qarın Telegram-da.
