Erlan Qarın: Qazaqstan men Ózbekstan aýqymdy ózgerister jolynda senimmen qadam basyp keledi
ASTANA. KAZINFORM - Memlekettik keńesshi Erlan Qarın Ózbekstan Respýblıkasy Prezıdentiniń kómekshisi Saıda Mırzıeevamen birge Zakovat zııatkerlik klýby uıymdastyrǵan is-sharaǵa qatysty, dep habarlaıdy Aqordanyń baspasóz qyzmeti.
Іs-sharanyń ashylýynda sóz sóılegen Erlan Qarın Zakovat jobasy eki el arasyn jalǵaǵan taǵy bir altyn kópirge aınalǵanyn jáne ekijaqty mádenı-gýmanıtarlyq baılanystardy nyǵaıtýǵa oń yqpal etetinin atap ótti.
Sondaı-aq ol Qazaqstan Prezıdenti Qasym-Jomart Toqaevtyń qoǵamda progressıvti qundylyqtar men ustyndardy, bilim kýltin, kásibı sheberlikti qurmetteý daǵdysyn ornyqtyrý qajettigi týraly udaıy aıtyp kele jatqanyna nazar aýdardy. Sońǵy jyldary Qazaqstanda pedagogterdiń, dárigerlerdiń, mádenıet jáne óner qaıratkerleriniń mártebesin kóterýge, kreatıvti ındýstrııany qoldaýǵa qatysty naqty sharalar qabyldanǵanyn, sondaı-aq jas ǵalymdardyń zertteýleri men taǵylymdamadan ótýine arnalǵan grant sany artqanyn, Prezıdenttik jastar kadrlyq rezervi qurylǵanyn aıtty. Atalǵan qundylyqtar men bastamalar Zakovat klýbynyń ıdeologııasymen úndesedi.
Budan bólek, Memlekettik keńesshi Qazaqstan men Ózbekstannyń aýqymdy ózgerister jolynda senimmen qadam basyp kele jatqanyn jetkizdi.
Erlan Qarın sózin qorytyndylaı kele, eki memleket arasyndaǵy kópjaqty yntymaqtastyq baýyrlas halyqtardyń ıgiligi úshin aldaǵy ýaqytta da nyǵaıa túsetinine senim bildirdi.
Saıda Mırzıeeva óz sózinde jastar árdaıym jasampazdyq úderisterinde mańyzdy ról atqaryp, órkenıettiń basty qozǵaýshy kúshi bolatynyn aıtty. Osyǵan baılanysty ol Zakovat jobasynyń eki el arasyndaǵy mádenı-gýmanıtarlyq seriktestikti keńeıtýdegi mańyzdylyǵyn atap ótti. Saıda Mırzıeevanyń aıtýynsha, mundaı jobalar Ortalyq Azııa elderiniń adamı kapıtalynyń sapasyn arttyrýǵa oń yqpal etedi.
Sonymen qatar ózbek delegatsııasynyń basshysy Qazaqstan men Ózbekstan prezıdentteriniń belsendi saıası dıalogy Ortalyq Azııanyń qaýipsiz, órkendegen aımaq retindegi statýsyn nyǵaıtýǵa septigin tıgizetinin aıryqsha atap ótti.
