Erlan Qarın: «Qazaqstan balalary» baǵdarlamasy BUU-nyń Turaqty damý maqsatyna sáıkes keledi
ASTANA. KAZINFORM — Búgin Úkimet Prezıdent Qasym-Jomart Toqaevtyń Ulttyq Quryltaıdyń Býrabaıda ótken otyrysynda bergen tapsyrmasy negizinde ázirlengen «Qazaqstan balalary» baǵdarlamasyn bekitti. Bul týraly Memlekettik keńesshi Erlan Qarın jelidegi paraqshasynda málimdedi.
Baǵdarlama memlekettiń balalar quqyqtaryn qorǵaý salasyndaǵy jumysynyń turaqty ári júıeli jalǵasy bolyp sanalady. Keshendi qujat negizgi salalardyń barlyǵynda balalardyń quqyqtaryn qamtamasyz etýge jáne qorǵaýǵa qatysty qoldanystaǵy tetikterdi biriktirýge ári júıeleýge baǵyttalǵan.
- «Qazaqstan balalary» vedomstvoaralyq ózara is-qımyldy nyǵaıtady jáne balalar múddesine baǵdarlanǵan saıasatty damytýǵa qatysty memlekettik turǵydan biryńǵaı kózqarasty qalyptastyrady. Buǵan qosa, «Qazaqstan balalary» baǵdarlamasy BUU-nyń Turaqty damý maqsattarynyń birqataryna sáıkes keledi. Baǵdarlamany iske asyrýdyń 2026-2030 jyldarǵa arnalǵan Іs-qımyl jospary jańa 158 naqty sharadan turady. Jospar balalardyń quqyqtyq qorǵalýyn, qaýipsizdigin jáne áleýmettik qoldaý júıesin jetildirýge baǵyttalǵan. Jospar aıasynda densaýlyq saqtaýdy qorǵaý, balalar ınfraqurylymyn keńeıtý, balalar marshrýtyna tsıfrlyq súıemeldeý júıesin engizý, onlaın qaýipsizdikti qamtamasyz etý sharalary jáne t.b. qarastyrylǵan, - dedi Erlan Qarın.
Balalar quqyqtary salasyndaǵy normatıvtik quqyqtyq bazany odan ári iske asyrý jáne jańartý kózdelip otyr. Jalpy alǵanda, «Qazaqstan balalary» baǵdarlamasy – balalardyń quqyqtary men bolashaq urpaqtyń ál-aýqatyn qamtamasyz etý baǵytyndaǵy negizgi memlekettik saıasatqa yqpal etetin keshendi ári uzaq merzimdi qujat.
- Balalardyń qorǵalýy men qaýipsizdigine qatysty máseleler basty baǵyttardyń biri sanalady jáne Prezıdent Qasym-Jomart Toqaevtyń erekshe nazarynda, - dedi Memlekettik keńesshi.
Aıta keteıik, «Qazaqstan balalary» tujyrymdamasy 1,3 trln teńge kóleminde qarjylandyrylady.