Erlan Qarın: Kandıdattardyń úgit-nasıhat jumystary qyzý júrip jatyr
«Úsh kún buryn ǵana elimizde saılaý kampanııasy bastalyp ketti. Protsess aıtarlyqtaı qyzý júrip jatyr. Kampanııaǵa ártúrli kandıdattar qatysýda. Eshkim de saılaý alańynan ysyrylyp jatqan joq. Belsendi úgit jumystaryn júrgizý úshin bárine teń múmkindikter, buqaralyq aqparat quraldaryna teń qoljetimdilik berilip otyr. Bılik shynynda da ashyq saılaý ári básekeli kúres júrgizýge daıyn otyr. Bul - Qazaqstan Prezıdentiniń prıntsıptik turǵydaǵy pozıtsııasy. Elimizde bolyp jatqan saılaý protsesi taǵy bir aýqymdy protsess - bılik tranzıtiniń bóligi sanalady. Aldaǵy kampanııa bılik tranzıtiniń aqtyq kezeńi deýge bolady», - deıdi Erlan Qarın.
Onyń aıtýynsha, elde shynaıy ózgerister oryn alyp jatyr. Bılik ashyq túrde dıalog júrgizip, formatty keńeıtýde.
«Prezıdent dıalog protsesin damytý boıynsha ártúrli bastamalardy kóterip otyr. Bul - aýqymdy jumystardyń tek basy deýge bolady. Onyń jańa formattary da kóp bolmaq. Sol sebepti, saıası protsess óte belsendi túrde júrýde», - deıdi Erlan Qarın.
Eske sala ketsek, 11 mamyrda Qazaqstanda kezekten tys prezıdent saılaýy aldyndaǵy úgit-nasıhat sharalary bastalǵan bolatyn. Úgit-nasıhat barysynda kandıdattar óz sózin ashyq aıtyp, úgitteýge múmkindik aldy.
Bıylǵy saılaý osymen altynshy ret ótip otyr. Osy joly QR Ortalyq saılaý komıssııasy jeti kandıdatty tirkedi. Olardyń ishinde «Nur Otan» partııasynan -Qasym-Jomart Toqaev, «Aýyl» halyqtyq-demokratııalyq patrıottyq partııasynan - Tóleýtaı Rahymbekov, Qazaqstannyń kommýnıster partııasynan Jambyl Ahmetbekov, «Ult taǵdyry» ulttyq-patrıottyq qozǵalysynan Ámirjan Qosanov, «Uly dala qyrandary» respýblıkalyq qozǵalysynan Sádi-Bek Túgel, Qazaqstan Respýblıkasynyń kásipodaqtar federatsııasynan Amangeldi Taspıhov jáne «Aq jol» Qazaqstannyń demokratııalyq partııasynan Danııa Espaeva bar.
