Erlan Qarın qandaı laýazym ıeleri partııaǵa múshe bola almaıtynyn eske saldy

ASTANA. QazAqparat – Memlekettik keńesshi Erlan Qarın «Amanat» atynan saılanǵan máslıhat depýtattarynyń respýblıkalyq forýmynda joǵary laýazymdy basshylar men partııalardyń baılanysy týraly oı qozǵady, dep habarlaıdy QazAqparat tilshisi.

«Eldegi reformalardyń mán-maǵynasy boıynsha Prezıdent eldegi barlyq saıası kúshterden tysqary turý kerek. Bul – basty qaǵıdattyń biri. Sondyqtan byltyr Konstıtýtsııalyq reforma aıasynda Memleket basshysy óz ókilettigin atqaratyn merzimde eshqandaı saıası partııanyń qatarynda bolmaý kerek degen erejeni engizý týraly bastamany kóterdi. Sodan keıin Prezıdent referendým qorytyndysyn kútpesten partııa qatarynan shyǵyp, tóraǵalyqtan bas tartty. Osylaısha Memleket basshysy reformalardy júzege asyrýǵa tabandylyǵyn kórsetti», - dedi Erlan Qarın.

Sondaı-aq ol endi zań boıynsha Konstıtýtsııalyq sottyń, Joǵarǵy sottyń jáne ózge de sottyń tóraǵalary men sýdıalaryna, Ortalyq saılaý komıssııasy men Joǵary aýdıtorlyq palata tóraǵasy men múshelerine qandaı da bir partııanyń qatarynda bolýǵa tyıym salynatynyn eske saldy.

«Sondaı-aq ákimder saıası partııanyń fılıaldarynda tóraǵa bola almaıdy. Osylaısha elimizde jańa saıası mádenıettiń negizi qalanyp jatyr», - dedi Memlekettik keńesshi.