Erlan Qarın: Halyqtyń qazaqsha kommentatorǵa talaby ósip keledi
«Qazaqstan» teleradıokorporatsııasynyń Basqarma tóraǵasy Erlan Qarın fýtboldan ótken Álem chempıonatynyń matchtaryn qazaq tilinde júrgizgen sport kommentatorlaryn synaǵandarǵa jaýap berdi, dep habarlaıdy QazAqparat tilshisi.
«Biz árıne, shyńǵa jettik dep aıtyp otyrǵan joqpyz. Eger jetistik bolsa, ony atap ótýimiz kerek. Bul bizdiń ujymnyń, mamandarymyzdyń eńbegi. Sebebi, biz óz áriptesterimizdi bir jaǵynan jigerlendirip otyrýymyz qajet. Eger olarǵa bizdiń kórermender alǵysyn aıtyp otyrsa (...) Meniń paraqshama kirseńiz, qanshama adam jazyp jatyr. Eger olar osylaı alǵys-tilegin bildirip jatsa, biz olarǵa árıne qoldaý kórsetemiz. Jigerlendiremiz», - deıdi Erlan Qarın.
Onyń aıtýynsha, sport kommentatorlarynyń qarapaıym qoldanystaǵy sózderdi qoldanýynyń ózindik taktıkasy bar.
«Bizdiń kommentatorlar juppen jumys isteıdi. Juptalǵan kezde bireýi taza sporttyq tilmen, al ekinshisi kishkene múmkin jalpylama sózderdi qoldanýy múmkin. Endi qalyń aýdıtorııa qarap otyrǵandyqtan, ony qyzyqtyrý kerek qoı. Sizder Latyn Amerıka men basqa elderdiń kommentatorlaryn kórseńizder, aıqaılap jatqanyn kóresizder. Árbir elde óziniń belgili bir aqparattyq-televızııalyq dástúri bar. Árbir eldiń qalyptasqan talaptary bar. Biz sol talaptarǵa saı jumys júrgizýge tyrystyq», - deıdi ol.
Erlan Qarın dese de eskertýler baryn atap ótti. Olardyń bári de tirkelip otyrǵanyn jetkizdi.
«Biraq, biz syn aıtýdan eshkimdi jibermeımiz ǵoı. Kórshilerimizden úırený kerek. Olar osyndaı birdeńe bolsa, tipti jeńilip jatqan jerde sony jeńis qylyp kórsetip jatady. Sondyqtan, biz áriptesterimizdi jigerlendirip, qaıta osy jyly maqtanyp otyrǵanym emes - biz úshin betburysty jyl boldy. Sebebi, bizdiń arnalardyń, jýrnalısteriniń artqanyn kórinip otyr. Halyq qazaq tilinde joǵary deńgeıde aqparat alǵylary keledi. Buryn qazaqsha sóılese eken dep ǵana aıtatyn edik. Qazir ol jetkiliksiz. Qazir talap ósip kele jatyr. Osyǵan qýaný kerek», - dep túıdi Erlan Qarın.
Eske sala ketsek, buǵan deıin Fýtboldan Reseıde ótken Álem chempıonatyn júrgizgen 15 sport kommentatorynyń ishindegi úzdikteri anyqtalǵanyn habarlaǵan bolatynbyz.
