Erlan Qarın halyqaralyq ǵylymı-praktıkalyq konferentsııaǵa qatysty

ASTANA. KAZINFORM — Memlekettik keńesshi Erlan Qarın Reseı Federatsııasy Altaı Respýblıkasynyń Gorno-Altaısk qalasynda ótip jatqan «Altaı – túrkilerdiń ata qonysy. Túrki órkenıetiniń qalyptasý tarıhy» atty ІІ halyqaralyq ǵylymı-praktıkalyq konferentsııa jumysyna qatysty. Bul týraly Aqorda málim etti.

Іs-sharaǵa Ázerbaıjan, Belarýs, Qazaqstan, Qyrǵyzstan, Majarstan, Mońǵolııa, Reseı, Túrikmenstan, Ózbekstan memleketteriniń lıngvısteri, arheologtary, altaıtanýshylary, túrkologtary, tarıhshylary jınaldy.

Konferentsııanyń ashylýynda Memlekettik keńesshi Qazaqstan Prezıdenti Qasym-Jomart Toqaevtyń qatysýshylarǵa arnaǵan quttyqtaý hatyn oqyp berdi. Sondaı-aq Reseı Federatsııasy Prezıdentiniń kómekshisi Vladımır Medınskıı jáne Qyrǵyz Respýblıkasynyń Memlekettik hatshysy Marat Imanqulov quttyqtaý sóz sóıledi.

– Erlan Qarın túrki órkenıetin zertteýge arnalǵan mundaı is-sharalardyń ótkizilýi ǵylym salasyndaǵy baılanystardy keńeıtetin mańyzdy baǵyt ekenin atap ótti. Osy turǵydan alǵanda Prezıdent Qasym-Jomart Toqaevtyń «Transaltaı dıalogyn» bastaý jónindegi usynysynyń máni zor. Bul óńirdegi ǵylymı-gýmanıtarlyq jáne ekonomıkalyq yntymaqtastyqty damytýǵa yqpal etýdi kózdeıdi. Sonymen qatar Memlekettik keńesshi bıyl Qazaqstanda álemniń 11 elinen kelgen qonaqtardyń qatysýymen «Altaı – túrki áleminiń altyn besigi» atty halyqaralyq festıval uıymdastyrylǵanyn eske saldy, – delingen habarlamada.

Sóz sońynda Erlan Qarın syndarly ári ashyq ǵylymı pikirtalas alańyn usynǵan uıymdastyrýshylarǵa alǵys aıtyp, qatysýshylarǵa nátıjeli jumys pen tolaıym tabys tiledi.

Buǵan deıin habarlanǵandaı, redaktsııa alqasy Qazaqstan tarıhynyń ekinshi tomyn basyp shyǵarýǵa ázirleý úshin bekitti.