Erlan Qarın: Elimizde mádenı, tarıhı eskertkishti búldirgenderge jaza kúsheıdi
ASTANA. KAZINFORM — Memlekettik keńesshi Erlan Qarın keshe qabyldanǵan birqatar jańa zańǵa pikir bildirdi.
Eske sala keteıik, keshe Memleket basshysy ákimshilik jaýapkershilikti qataıtatyn birqatar qujatqa qol qoıdy.
Onyń ishinde vandalızm men qoǵamdyq tártipti buzǵany úshin jaýapkershilikti kúsheıtetin zań da bar.
Erlan Qarınniń aıtýynsha, bul — Ulttyq quryltaıdyń úshinshi otyrysynda kóterilgen bastamalardy júzege asyrý aıasynda qabyldanǵan tórtinshi zań.
«Budan buryn veıptke tyıym salýǵa, áıelderdiń quqyǵyn qorǵaýǵa jáne balalardyń qaýipsizdigine, „Aıbyn“ ordeniniń túrli dárejelerine batyrlardyń esimin berýge qatysty zańǵa qol qoıylǵan bolatyn. Memleket basshysy Atyraýda sóılegen sózinde tártipsizdik pen mádenıetsizdik syndy keselderge qarsy kúresýge shaqyryp, vandalızmdi teris qylyq dep atap ótti», -dep jazdy Memlekettik keńesshi Telegram paraqshasynda.
Qol qoıylǵan zańda:
— qoǵamdyq oryndardy lastaý;
— bótenniń múlkin qasaqana joıý nemese búldirý;
— tarıh, mádenıet eskertkishterin, tabıǵı keshenderdi nemese memleket qorǵaýǵa alǵan obektilerdi, sondaı-aq erekshe tarıhı, ǵylymı, kórkemdik nemese mádenı qundylyǵy bar zattardy nemese qujattardy qasaqana joıý nemese búldirý úshin jaýapkershilik kúsheıtilgen.
