Erlan Qarın: Elbasy maqalasy - memlekettik ıdeologııany anyqtaıtyn saıası-ıdeologııalyq qujat
ASTANA. QazAqparat - «Egemen Qazaqstan» respýblıkalyq gazetinde jarııalanǵan Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasy - memlekettik ıdeologııany anyqtaıtyn saıası-ıdeologııalyq qujat. Bul týraly áleýmettik jelidegi paraqshasynda «Qazaqstan» RTRK» AQ basshysy, saıasattanýshy Erlan Qarın osylaı jazdy, dep habarlaıdy QazAqparat.
Erlan Qarın maqalanyń tek «Egemen Qazaqstan» gazetinde qazaq tilinde ǵana jaryq kórgenine nazar aýdarady. «Bul maqalada aıtylǵan oılar, tezıster ulttyq ıdeologııaǵa, qazaq qoǵamyna arnaıy baǵyttalǵanyn ańǵartsa kerek. Sondyqtan, bul maqalany qazaq halqyna joldaý sııaqty qabyldaýǵa bolady», - dep paıymdaıdy Erlan Qarın.
Onyń aıtýynsha, Elbasynyń maqalasy - memlekettik ıdeologııany anyqtaıtyn, jańa ıdeologııalyq platformaǵa aınalatyn, saıası-ıdeologııalyq qujat.
«Sebebi ol saıası, ekonomıkalyq, áleýmettik, quqyqtyq reformalardan soń ıdeologııalyq saıasatty modernızatsııalaýdy kún tártibine shyǵardy. Máselen, latyn qarpine kóshý óte mańyzdy sheshim. Men osy týrasynda buryn da pikirimdi aıtqanmyn, másele latyn álipbıine kóshýimizde emes, naqty órkenıettik tańdaýymyzdy jasaýymyzda. Endigi rette Elbasy buryn jáne búgingi usynyp otyrǵan jańa tyń ıdeıalardy naqty is júzinde asyrýdyń josparyn usynyp otyr. Bul qujat - qazaq ulttyq múddesiniń strategııalyq baǵytyn aıqyndaıtyn jańa ıdeologııalyq kontseptsııa. Ultty belgili bir áreketke jigerlendiretin, túrtki bolatyn prıntsıpterdiń jıyntyǵy. Sondyqtan, biz Prezıdent maqalasynda aıtylǵan jańa, tyń ıdeıalardy «Qazaqstan» telearnasy men «Qazaq» radıosynyń túrli baǵdarlamalarynda jan-jaqty, salmaqty talqylaýdy uıymdastyrýǵa ázirmiz», - deıdi E. Qarın.
