Erlan Qarın: Búgin elimizde AES salý máselesine qatysty aqparattyq-túsindirý jumysy aıaqtalady

ASTANA. KAZINFORM – Búgin elimizde Atom elektr stansasyn salý máselesine qatysty referendým aıasynda týra 400 kúnge sozylǵan aqparattyq-túsindirý jumysy aıaqtalady. Bul týraly QR Memlekettik keńesshisi Erlan Qarın málim etti.

«Ony Qazaqstannyń saıası tarıhyndaǵy eń uzaq naýqan deýge tolyq negiz bar. Nege 400 kún? Sebebi Memleket basshysy referendým ótkizý týraly ıdeıasyn byltyr, ıaǵnı 2023 jylǵy 1 qyrkúıekte kezekti Joldaýynda aıtty. Dál sol kúni referendýmǵa qatysty aýqymdy jumys bastaldy deýge bolady. Osy ýaqyt ishinde ár aımaqta qoǵamdyq tyńdaý uıymdastyryldy, aqparat keńistiginde sarapshylar men qoǵam belsendileri jan-jaqty pikir almasty», - dep jazdy Erlan Qarın óziniń Telegram arnasynda. 

Memlekettik keńesshi osy naýqan baısaldy túrde, ózara túsinistik jaǵdaıynda ótkenin aıtty. Onyń aıtýynsha, refendým kezinde elimizdegi qoǵamdyq kúshter alǵash ret saıası emes, ekonomıkalyq múdde turǵysynan kúsh-jigerin biriktirgenin atap ótken jón.

«AMANAT» partııasynyń bastamasymen 6 saıası partııa jáne 20-dan astam qoǵamdyq birlestik Atom elektr stansasyn salýdy qoldaý jónindegi halyqtyq shtab qurdy. Shtab músheleri barlyq óńirdiń turǵyndarymen kezdesý ótkizdi, oǵan energetıka salasynyń jetekshi sarapshylary men mamandary qatysty. Osylaısha, azamattarymyzdyń Qazaqstanda atom energetıkasyn damytýǵa qatysty baıypty toqtamǵa kelýine múmkindik berildi», - dedi Memlekettik keńesshi.