Erlan Qarın búgingi Prezıdent sóziniń negizgi túıinin tarqatyp berdi

ASTANA. QazAqparat - Qazaqstan halqy Assambleıasynyń búgingi sessııasy atalǵan forýmnyń elimizdegi mańyzdy saıası oqıǵalardyń biri ekenin anyq kórsetti. Memlekettik keńesshi Erlan Qarın osylaı dep pikir bildirdi, dep habarlaıdy QazAqparat.

«Memleket basshysy Assambleıada sóılegen sózinde memlekettik qurylystyń irgetasy etnosaralyq kelisim men birlikke negizdeletinin ańǵartty. Etnosaralyq qatynas baǵytyndaǵy memlekettik saıasattyń tıimdiligin arttyrý úshin keshendi mindetter qoıyldy. Prezıdent sóziniń negizgi túıini mynandaı tujyrymǵa saıady: jalpyulttyq biregeılikti áleýmettik-saıası, ekonomıkalyq jáne rýhanı qundylyqtardy negizge ala otyryp, tabıǵı ári tarıhı jolmen qalyptastyrý jáne damytý kerek»,-dep jazady Erlan Qarın Telegram paraqshasynda.

Prezıdenttiń aıtýynsha, «bizdiń barsha halqymyz ózderin úlken jáne birtutas qazaq ultynyń ajyramas bóligi retinde sezinedi», «ondaǵy árbir etnos dostyqty, úılesimdilik pen kelisimdi nyǵaıtýǵa baǵa jetpes úles qosyp otyr».

Osy oraıda Memleket basshysy jalpyulttyq biregeıliktiń nyshandaryn taǵy bir márte atap ótti.

«Birinshi, azamattyq biregeıligimizdi tanytatyn kók tólqujat. Bul barlyq azamattyń teń jáne memlekettiń qorǵaýynda ekenin kórsetedi. Ekinshisi, Qazaqstannyń táýelsizdigin, onyń ǵasyrlar boıy jalǵasyp kele jatqan memlekettiligin beıneleıtin aspan tústes kók baıraq»,-deıdi Memlekettik keńesshi.