Erlan Qarın birqatar Telegram-kanaldardaǵy jarııalanymdardy aqparattyq vırýs dep atady

NUR-SULTAN. QazAqparat – Prezıdenttiń keńesshisi Erlan Qarın keıbir Telegram-kanaldardaǵy málimdemelerge qatysty pikir bildirdi, dep habarlaıdy QazAqparat tilshisi.

«Sońǵy kezderi keıbir telegram-kanaldardaǵy jarııalanymdarǵa qatysty pikir bildirýdi suraıtyndar jıilep ketti. Shynymen de, búginde jelide túrli telegram-kanaldar kóbeıdi. Alaıda olar negizinen anonımdi jáne saıası ınsaıdtar túrinde jalǵan aqparat taratady», - dep jazdy E. Qarın Telegram paraqshasynda.

Onyń paıymynsha, osy kanaldardyń kóbisi naqty qurylymdar men adamdarǵa qarsy aqparattyq áreketter jasaýǵa baǵyttalǵan. Osy arqyly bul jarııalanymdardyń tapsyrystyq sıpaty kórinip tur.

Onyń sózine qaraǵanda, feık aqparatty taratý bóliginde «Uzyn Qulaq» kanaly erekshelenýde. Kanaldyń ataýynyń ózi túrli qaýeset pen ósekke negizdelgenin sıpattap tur.

«Osy áreketter aqparattyq soǵysty bastaý men adamdardy bir-birine óshiktirý arqyly jaǵdaıdy turaqsyzdandyrý úshin ádeıi istelip jatyr. Bılik pen qoǵamnyń nazary tolyqtaı koronavırýs indetimen jáne onyń saldarymen kúresýge shoǵyrlanǵan kezde, olardyń jarııalanymdarynyń dál qazir jandanǵany kezdeısoq emes», - dedi E. Qarın.

Osy oraıda ol mundaı resýrstardyń arandatýshylyq qadamdary uıymdastyrylǵan aqparattyq qaskúnemdik ekenin jetkizdi.

«Álemdegi jáne eldegi qazirgi ońaı emes jaǵdaıda kez kelgen feık-aqparat – ol da vırýs ispetti, biraq ta aqparattyq vırýs. Bul vırýs dúrbeleń men tártipsizdik týdyrýǵa negizdelgen», - dep jazdy ol.

Osy oraıda Erlan Qarın daý-damaı týdyrý men jikke bólýdiń kez kelgen áreketine qatań tosqaýyl qoıylatynyn atap ótti.

«Bizdińshe, quqyq qorǵaý organdary atalǵan anonımdi kanaldyń qyzmetin tyńǵylyqty zerttep, qoldanystaǵy zańnama aıasynda tıisti sharalardy qabyldaý arqyly quqyqtyq baǵa bergeni durys», - dedi ol.