Erlan Qarın: Basty basymdyq azamattarymyzdyń densaýlyǵy men qaýipsizdigine beriledi
NUR-SULTAN. QazAqparat - Basty basymdyq - bul azamattarymyzdyń densaýlyǵy men qaýipsizdigi. Bul týraly QR Prezıdentiniń kómekshisi Erlan Karın Telegram paraqshasynda jazdy, dep habarlaıdy QazAqparat tilshisi.
«Eldegi tótenshe jaǵdaıdyń alǵashqy aptasy ótti. Tótenshe jaǵdaıdyń eń birinshi kúninen bastap bılik jedel ári jaǵdaıdyń aldyn orap áreket etti. Tótenshe jaǵdaı engizý sharalary men eki iri qala — Nur-Sultan men Almatyda karantın boıynsha aıryqsha rejım engizý durys boldy. Bul aýrý juqtyrý jaǵdaılary baıqalǵan negizgi qalalardy oqshaýlaýǵa jáne vırýstyń ózge qalalarǵa aýqymdy taralýyna jol bermeýge múmkindik jasady. Jańa vırýs juqtyrǵan adamdardyń Almaty, Qaraǵandy jáne Aqtóbe oblystarynda tirkelý faktisi shetelden kelgen azamattarmen baılanysty boldy. Juqtyrǵandar sany ósip kele jatqanymen keıbir ózge elderdegideı aýqymda óte qarqyndy emes. Munyń barlyǵy da qatań, batyl ári jedel sharalardyń arqasynda oryn aldy» - dedi QR Prezıdentiniń keńesshisi.
Onyń atap ótýinshe, ortalyq jáne óńirlik bılik qysqa ǵana ýaqyttyń ishinde qajetti resýrstardy jumyldyryp, barlyq qyzmetterdiń jumysyn jolǵa qoıa aldy. Bul memlekettiń mundaı aýqymdaǵy daǵdarysty jaǵdaıda áreket etýge qabiletti ekendigin kórsetedi.
«Tótenshe jaǵdaı rejıminiń alǵashqy kúnderi qoǵamnyń da daǵdarys jaǵdaıynda judyryqtaı jumylýǵa qabiletti ekendigin kórsetip berdi. Tótenshe jaǵdaı rejımi aıasynda engizilgen birqatar shekteý shalaryna, karantınnen týyndaǵan qolaısyzdyqtar men qıyndyqtarǵa qaramastan kóptegen qazaqstandyqtar qazirgi jaǵdaıǵa túsinistikpen qarap qoımaı, ózara kómek kórsetip, túrli volenterlik, qaıyrymdylyq sharalaryna bastamashylyq jasap, qatysýda. Degenmen, jaǵdaıdyń kúrdeliligin tolyq baǵalamaý áli de bar, barlyǵy birdeı karantın men tótenshe jaǵdaı talaptaryn túsinbeıdi ári saqtamaıdy. Óz kezeginde memleket azamattar men bızneske qoldaý kórsetý boıynsha baıypty sharalar kórsetip jatyr. Jergilikti jerlerde kórsetilip jatqan salyqtyq jeńildikter men ózge qoldaý sharalarynan bólek memleket tótenshe jaǵdaı engizilýine baılanysty tabysynan aıyrylǵan tulǵalarǵa aı saıyn tólem jasaýǵa nıetti», - dedi Erlan Karın.
Onyń aıtýynsha, jaǵdaı kúrdeli bolǵanymen baqylaýda tur. Degenmen, Prezıdent Qasym-Jomart Toqaev atap ótkendeı, jaıbaraqat júrýge bolmaıdy. Kez kelgen qolaısyzdyqtarǵa jaǵdaıdyń órbýine qatysty eń nashar nusqanyń ózine de daıyn bolýymyz qajet.
«Qazir álemdegi jalpy ahýaldyń qalaı damıtyndyǵyna kóp jaıt táýeldi bolyp tur. Ókinishke qaraı, keıbir elder sharalardy keshigip qabyldady. Sondyqtan daǵdarys sozylýy múmin. Qazir memlekettik apparat jańa taktıkalyq josparmen jáne munan arǵy jalpy strategııamen jumys istep jatyr. Bul jaıynda Tótenshe jaǵdaı jónindegi memlekettik komıssııa otyrysynda búgin Prezıdent aıtty. Qazirgi sáttegi basty basymdyq - bul azamattarymyzdyń densaýlyǵy men qaýipsizdigi. Barlyq memlekettik organdardyń jumysy eń aldymen osyǵan baǵyttalady», - dedi ol.
