Erlan Qarın bastaǵan qazaqstandyq delegatsııa QHR-da ótken is-sharalarǵa qatysty
ASTANA. KAZINFORM - Medıa jáne taldaý qurylymdary ókilderinen jasaqtalǵan Qazaqstannyń delegatsııasy Beıjińde birqatar is-sharaǵa qatysty. Delegatsııany Memlekettik keńesshi bastap bardy.
Erlan Qarın Qytaıdyń Halyqtyq saıası konsýltatıvtik keńesi Búkilqytaılyq komıtetiniń tóraǵasy Van Hýnınmen jáne Qytaı kommýnıstik partııasy Ortalyq komıtetiniń Nasıhat bóliminiń meńgerýshisi Lı Shýleımen kezdesti.
Basqosýda taraptar óz elderinde atqarylyp jatqan áleýmettik-ekonomıkalyq jáne mádenı-gýmanıtarlyq saladaǵy jumystyń negizgi baǵyttarymen tanystyrdy. Eki elde júrgizilip jatqan reformalardy talqylady. Sondaı-aq Qazaqstanda ótetin «Ortalyq Azııa – Qytaı» ekinshi sammıtine oraı birlesken is-sharalar uıymdastyrýǵa ýaǵdalasty.
Erlan Qarın Qytaıdyń qoǵamdyq ǵylymdar akademııasynyń prezıdenti Gao Sıanmen júzdesti. Sonymen qatar Qazaqstan men Qytaıdyń taldaý ortalyqtarynyń alǵashqy forýmynda sóz sóıledi.
Forým aıasynda Qazaqstannyń strategııalyq zertteýler ınstıtýty men Qytaıdyń qoǵamdyq ǵylymdar akademııasy Ózara túsinistik týraly memorandýmǵa qol qoıdy. Sondaı-aq eki eldiń taldaý ortalyqtarynyń yntymaqtastyǵyn odan ári damytýǵa arnalǵan jumys sessııasy ótti.
Sapar aıasynda Qazaqstannyń memlekettik telekompanııalarynyń basshylary Qytaıdyń asa iri «China Media Group» medıa korporatsııasynyń qyzmetimen tanysty. Kezdesý barysynda olar qytaılyq áriptestermen aqparat salasyndaǵy yqpaldastyqty damytý jáne birlesken jobalardy júzege asyrý máselelerin talqylady.
Sonymen birge Memlekettik keńesshi Qytaı Halyq ýnıversıtetiniń professorlyq-oqytýshylyq ujymyna jáne stýdentterine dáris ótkizdi. Dáris barysynda Prezıdent Qasym-Jomart Toqaevtyń basshylyǵymen júzege asyrylyp jatqan reformalar týraly jan-jaqty málimet berildi.
Memlekettik keńesshi kezdesýlerdiń qorytyndysy boıynsha aýqymdy is-sharalardy uıymdastyrǵany úshin qytaılyq áriptesterine alǵysyn bildirdi. Eki el basshylarynyń arqasynda Qazaqstan men Qytaı arasyndaǵy qarym-qatynas jan-jaqty máńgilik strategııalyq áriptestik deńgeıine kóterilgenin atap ótti.