Erlan Qarın balalardyń qaýipsizdigin qamtamasyz etýge qatysty jıyn ótkizdi
ASTANA. KAZINFORM – Memlekettik keńesshi Erlan Qarınniń tóraǵalyǵymen balalardyń qaýipsizdigin qamtamasyz etý, kámeletke tolmaǵandarǵa qatysty zań buzýshylyqtyń aldyn alý jáne onyń jolyn kesý máselesine arnalǵan jıyn ótti. Bul týraly Aqordanyń baspasóz qyzmeti habarlady.
Jıynda Oqý-aǵartý mınıstri, Bala quqyqtary jónindegi ýákil, sondaı-aq Jetisý jáne Túrkistan oblysy ákimderiniń orynbasarlary atqarylyp jatqan jumys týraly baıandama jasady.
Erlan Qarın júıeli sharalardyń nátıjesinde salada birqatar oń úrdis baıqalatynyn aıtty. Máselen, ótken jylmen salystyrǵanda balalar men jasóspirimderdi jynystyq qatynasqa túsýge májbúrleý qylmystarynyń sany 12,5 paıyzǵa azaıǵan. Sondaı-aq «111» baılanys ortalyǵy men QR-kod arqyly kúrdeli psıhoemotsııalyq jaǵdaıǵa dýshar bolǵan nemese zorlyq-zombylyq pen qatygezdikke ushyraǵan 4174 balaǵa kómek kórsetilgen. Onyń ishinde 34 jaǵdaıda balalar sýıtsıdiniń aldyn alǵan.
Alaıda Memlekettik keńesshi bala qaýipsizdigin qamtamasyz etý máselesi áli de ózekti ekenine nazar aýdardy.
Erlan Qarın balalar men jasóspirimderdiń qaýipsizdigine qatysty aldyn alý sharalaryn aımaq basshylyǵy tikeleı baqylaýynda ustap, júıeli jumys atqarýy qajet ekenin eskertti.
Jıyn qorytyndysy boıynsha Oqý-aǵartý mınıstrligine osy baǵyttaǵy jumysty utymdy úılestirý ári tıimdi sharalar ázirleý tapsyryldy.
Bul rette Memlekettik keńesshi óńir basshylyǵynyń qatysýymen mundaı jıyndar udaıy ótkizilip turatynyn eske saldy.
Aıta keteıik, Qazaqstanda balalardyń erte damýy úshin qyzmetterge teń múmkindik beretin qujat qabyldandy.