Erlan Qarın balalardyń qaýipsizdigin qamtamasyz etýge qatysty jıyn ótkizdi
ASTANA. KAZINFORM – Memlekettik keńesshiniń tóraǵalyǵymen balalardyń qaýipsizdigin qamtamasyz etý, kámeletke tolmaǵandarǵa qatysty quqyq buzýshylyqtyń aldyn alý máselesine arnalǵan jıyn ótti. Bul týraly Aqordanyń baspasóz qyzmeti habarlady.
Basqosýǵa Almaty qalasy, Almaty, Batys Qazaqstan, Jambyl jáne Túrkistan oblystary ákimderiniń orynbasarlary, sondaı-aq Oqý-aǵartý mınıstrliginiń, Bas prokýratýranyń basshylyǵy jáne Bala quqyqtary jónindegi ýákil qatysty.
Jıynda Bas prokýrordyń orynbasary Jandos Ómirálıev, Bala quqyqtary jónindegi ýákil Dınara Zákıeva baıandama jasady. Olar bala quqyqtaryn qorǵaýdyń ózekti máselelerine toqtaldy.
Osyǵan oraı Memlekettik keńesshi balalar men jasóspirimderdiń qaýipsizdigine aımaq basshylyǵy basa mán berip, bul isti turaqty baqylaýǵa alýy qajet ekenine nazar aýdardy. Sonymen birge jergilikti jerde basshylardyń qatysýymen osyndaı jıyndar turaqty túrde ótkiziletinin atap ótti.
Erlan Qarın bul baǵyttaǵy jumysty jalǵastyra berýdi jáne tıisti is-sharalardy pysyqtaýdy tapsyrdy.
Erlan Qarın ishki saıasat máselelerin talqylaý úshin Ulttyq quryltaı múshelerimen kezdesken edi.