Erlan Qarın áıelder men balalar quqyǵyn qorǵaý týraly zań jobasyna qatysty pikir bildirdi
ASTANA. KAZINFORM – QR Memlekettik keńesshisi Erlan Qarın elimizdegi áıelder men balalar quqyǵyn qorǵaý týraly zań jobasyna qatysty pikir bildirdi.
«Búgin Májilistiń plenarlyq otyrysynda áıelderdiń quqyqtaryn jáne balalardyń qaýipsizdigin qamtamasyz etýge qatysty zań jobasy birinshi oqylymda qabyldandy. Onda turmystyq zorlyq-zombylyq máselelerin sheshýdiń jan-jaqty tásilderi qarastyrylǵan. Bul qujat Prezıdenttiń byltyr kúzde jarııalaǵan Joldaýyn júzege asyrý aıasynda ázirlendi. Jalpy, osy jobaǵa sáıkes túrli zań aktilerine 70 túzetý engizý kózdelip otyr. Sonyń ishinde, otbasylarǵa kómek kórsetý ınfraqurylymyn qalyptastyrýǵa baǵyttalǵan ózgeristerdi, sondaı-aq turmys salasyndaǵy qylmystar jáne balalarǵa qarsy jasalǵan zorlyq-zombylyqtyń barlyq túri úshin jazany kúsheıtýdi atap ótýge bolady. Máselen, adamdy uryp-soqqany, densaýlyqqa jeńil, aýyrlyǵy ortasha jáne aýyr zııan keltirgeni, azaptap-qınaǵany úshin qylmystyq jaýapkershilik engizildi jáne kúsheıtildi», - dep jazdy Erlan Qarın Telegram-da.
Aıtýynsha, budan bólek, turmystyq zorlyq-zombylyq faktilerin anyqtaýǵa jáne aldyn alýǵa baǵyttalǵan birqatar shara kózdelgen.
«Zań jobasyn depýtattar memlekettik organdarmen, sarapshylar qaýymdastyǵymen jáne qoǵamdyq uıymdarmen birlesip ázirledi. Bul qujatty daıyndaýǵa Balalar quqyǵy jónindegi ýákil Dınara Zákıeva belsene atsalysty», - dep atap ótti.
Buǵan deıin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zań jobasy men ilispe qujat birinshi oqylymda maquldanǵanyn jazǵan bolatynbyz.
