Erlan Karın: Aýyl ákimderin tikeleı saılaý - úlken saıası betburystardyń basy
«Qyrkúıektiń birinshi kúni Parlamenttiń jańa sessııasynyń ashylýynda Prezıdent Qasym-Jomart Kemeluly Toqaev Qazaqstan halqyna jańa Joldaýyn jarııalady. Joldaý kólemdi de mazmundy bolǵany sonshalyq keıbir baqylaýshylar Prezıdent Parlament minberinen 88 mınýt boıy úzdiksiz sóz sóıledi dep eseptepti. Shyndyǵynda da, Prezıdent Joldaýy kólemdi qujat bolyp shyqty. Bıylǵy Joldaý 11 iri taraýdan turady: ekonomıka, memlekettik basqarý, áleýmettik saıasat, aımaqtardyń damýy, bilim berý, densaýlyq saqtaý, tsıfrlandyrý, ekologııa, quqyq qorǵaý salasy, saıası reforma jáne jańa qundylyqtar. Keıbir sarapshylar Prezıdenttiń bıylǵy Joldaýynda «saıası taqyryp az qamtyldy» dep baǵa berýde. Ókinishke oraı bul sarapshylar atalǵan mańyzdy qujatty muqııat qarap, tereń taldamaǵany kórinip tur», - dedi Erlan Karın.
Onyń atap ótýinshe, shyn mánisinde Prezıdent bıylǵy Joldaýda bir emes birneshe taraýdy ózekti, túrli saıası-qoǵamdyq máselelerge arnap, kóptegen jańa saıası bastamalardy jarııalady.
«Kelesi saıası bastamalardy aıtýǵa bolady: azamattarǵa reformalarǵa bastamashy bolyp, usynystar berý úshin onlaın petıtsııalardyń biryńǵaı ınstıtýtyn qurý, jergilikti ózin-ózi basqarý tujyrymdamasyn ázirleý jáne qabyldaý, jergilikti ózin-ózi basqarý organdarynyń mártebesin kóterý, jergilikti ózin-ózi basqarýdyń qarjylyq múmkindigin nyǵaıtý, máslıhattardyń revızııalyq komıssııasyn kúsheıtý, máslıhattarǵa óńirdi damytý boıynsha petıtsııaǵa qol jınaýǵa, ázirleýge quziret berý, máslıhat otyrystarynyń onlaın kórsetilimin engizý, qoǵamdyq baqylaý týraly zańdy ázirleý jáne qabyldaý, kvazımemlekettik sektorda qoǵamdyq keńesterdi qurý, múliktik menshik ıeleriniń birlestigi ınstıtýtyn engizý boıynsha reforma jasaý», - dedi ol.
Erlan Karın sonymen qatar bıylǵy Joldaýda quqyq qorǵaý júıesin reformalaý boıynsha da jańa, tyń bastamalar usynylǵanyn aıtady.
«Mysaly, Ekonomıkalyq ynytymaqtastyq jáne damý uıymy elderiniń tájirıbesi boıynsha qylmyspen kúres salasyn ózgertip, ókilettikterdiń ara jigin naqty ajyratatyn úsh býyndy engizý, jergilikti polıtsııa qyzmetin reformalaý, ýchaskelik polıtsııa mártebesin kóterý, polıtsııanyń qyzmettik ǵımarattary men túzetý mekemelerinde jappaı beınebaqylaý ornatý. Sondaı-aq bıylǵy Joldaýda adam quqyqtary máselesine erekshe nazar aýdaryldy. Atap aıtqanda, bala quqyǵyna qatysty halyqaralyq konventsııanyń fakýltatıvtik hattamasyna qosylý, azamattardy kıberbýllıngten qorǵaý boıysha zańnamalyq sharalardy qabyldaý, halyqaralyq konventsııanyń qosymshasyna sáıkes azaptaýdyń barlyq túrimen kúres boıynsha zańnamany jetildirý jáne adam saýdasyna qarsy kúres boıynsha zańnamany jetildirý», - dedi ol.
Prezıdent keńesshisiniń paıymynsha, eń basty saıası reforma ol kelesi jyldan, ıaǵnı, 2021 jyldan bastap aýyl ákimderiniń tikeleı saılanatyndyǵy bolyp otyr.
«2010 jyldan bastap aýyl ákimderi máslıhattar arqyly janama 4 jylǵa saılanatyn. Sondyqtan 2017 jyly kezekti saılaý ótip, 2021 jyly, kelesi jyly aýyl ákimderiniń ókilettikteri aıaqtalatyny belgili. Soǵan baılanysty Prezıdent Qasym-Jomart Kemeluly Toqaev kelesi jyldan bastap ókilettigi toqtaǵan aýyl ákimderi endi tikeleı saılanatyn bolady dep sheshim qabyldady. Bul bizdiń elimiz úshin óte mańyzdy saıası reforma, úlken saıası betburystardyń basy dep qabyldaýymyz kerek. Osylaısha, Prezıdenttiń jańa bastamalaryn saıası reformalardyń 2-toptamasy dep qabyldaýǵa bolady. Esterińizge salyp óteıin, birinshi toptama ótken jyly Ulttyq keńestiń 2-otyrysynda jarııalandy. Mazmuny jaǵynan jańa toptama aýqymdy. Saıası jańǵyrýǵa qatysty taraýdy túıindeı kele Prezıdent saıası salany jańǵyrtý jalǵasatynyn jáne memlekettik bıliktiń barlyq derlik ınstıtýttary reformalanatyndyǵyn taǵy da basyp aıtty. Al barlyq reformalardyń negizgi maqsaty - tutas memlekettiń tıimdiligin arttyrý», - dedi Erlan Karın.
