Erlan Qarın áskerı-patrıottyq tárbıe jónindegi jumysty kúsheıtýdi tapsyrdy
ASTANA. KAZINFORM – Memlekettik keńesshi Jastarǵa áskerı-patrıottyq tárbıe berý jónindegi respýblıkalyq úılestirý keńesiniń otyrysyna qatysty. Bul týraly Aqordanyń baspasóz qyzmeti habarlady.
Memlekettik keńesshi Erlan Qarın Qorǵanys mınıstrligi janyndaǵy Jastarǵa áskerı-patrıottyq tárbıe berý jónindegi respýblıkalyq úılestirý keńesiniń otyrysyna qatysty.
Jıynda Oqý-aǵartý mınıstri Juldyz Súleımenova, Ǵylym jáne joǵary bilim mınıstri Saıasat Nurbek, Mádenıet jáne aqparat vıtse-mınıstri Evgenıı Kochetov, sondaı-aq Abaı jáne Qostanaı oblystarynyń ákimderi baıandama jasady.
Іs-shara barysynda Memleket basshysynyń áskerı-patrıottyq tárbıe salasyndaǵy bastamalaryn tıimdi júzege asyrý máseleleri talqylandy.
Erlan Qarın jeltoqsan aıynyń basynda Memleket basshysy Qasym-Jomart Toqaev Qarýly kúshterdegi, basqa da qurylymdardaǵy áskerı jáne quqyqtyq tártipti qamtamasyz etý jóninde jıyn ótkizgenin aıtty. Onyń qorytyndysyna sáıkes Prezıdent zańdylyq pen quqyqtyq tártipti qamtamasyz etýge, armııadaǵy tárbıe jumysyn jetildirýge qatysty naqty tapsyrmalar bergenine nazar aýdardy.
Osyǵan baılanysty Memlekettik keńesshi áskerı-patrıottyq tárbıe salasyndaǵy negizgi basymdyqtardy aıqyndap berdi. Atap aıtqanda, áskerı-patrıottyq tárbıe jumysyna jalpyulttyq qundylyqtardy engizý, jastardy ásker qataryna shaqyrýdyń formasy men tásilderin jańǵyrtý, Qorǵanys mınıstrligi men qoǵam arasynda tıimdi kommýnıkatsııa arnalaryn qalyptastyrý, ortalyq jáne jergilikti atqarýshy organdardyń biryńǵaı is-qımyl josparyn ázirleý, ardager uıymdarymen ózara tıimdi áreket etý, áskerı oqý oryndary men jastar qozǵalystarynyń áleýetin nyǵaıtý, 2026 jyly ótetin «Aıbyn» áskerı-patrıottyq jıynyn mazmundy uıymdastyrý sekildi basym baǵyttardy eskerý mańyzdy.
Úılestirý keńesiniń qorytyndysy boıynsha Erlan Qarın memlekettik organdarǵa naqty tapsyrmalar berdi. Sondaı-aq áskerı-patrıottyq tárbıe salasyndaǵy jumys tásilderin jetildirýge jaýapkershilikpen qaraý kerek ekenin eskertti.
Aıta ketelik keshe Memleket basshysy Tarazdaǵy áskerı mektep-ınternatqa barǵan edi.