Erlan Qarın áskerı-patrıottyq tárbıe salasyn jetildirýge qatysty tapsyrma berdi

ASTANA. KAZINFORM –  Aqordada Memlekettik keńesshi Erlan Qarınniń tóraǵalyq etýimen áskerı-patrıottyq tárbıe berý máselesi jóninde jıyn ótti.

Basqosýǵa Qorǵanys, Mádenıet jáne aqparat, Oqý-aǵartý, Ǵylym jáne joǵary bilim mınıstrlikteriniń basshylyǵy, Bas prokýratýra, Prezıdent Ákimshiligi qurylymdyq bólimsheleriniń ókilderi men Parlament depýtattary qatysty.

Jıynda Memleket basshysynyń áskerı-patrıottyq tárbıe salasyndaǵy bastamalaryn tıimdi júzege asyrý máseleleri talqylandy.

Erlan Qarın memlekettik organdar ishki saıasat baǵytyndaǵy jumystary aıasynda áskerı-patrıottyq tárbıe berý boıynsha jekelegen is-sharalar uıymdastyrýdy qolǵa alǵanyna nazar aýdardy.

Atap aıtqanda, mektepterde tárbıe jumysynyń jańa baǵdarlamasy júzege asyryla bastady, Parlament depýtattary tıisti zań jobasyn qarastyryp jatyr, Qorǵanys mınıstrligi Jastarǵa áskerı-patrıottyq tárbıe berýdiń 2030 jylǵa deıingi tujyrymdamasyn ázirledi.

Memlekettik keńesshi atqarylyp jatqan jumysty júıeleý jáne bir jerden úılestirý qajet ekenin aıtty. Bul rette Erlan Qarın, eń aldymen, tujyrymdamalyq negizdemeni aıqyndaý, quqyqtyq bazany qalyptastyrý jáne barlyq memlekettik organdar men ınstıtýttardyń biryńǵaı is-qımyl josparyn ázirleý mindetterin aıqyndady.

Jıyn sońynda Memlekettik keńesshi jaýapty memlekettik organdarǵa naqty tapsyrmalar berip, áskerı-patrıottyq tárbıe salasyndaǵy jumys tásilderin jetildirý úshin mundaı basqosýlar turaqty túrde ótkiziletinin atap ótti.