Erlan Qarın Adam quqyqtary jónindegi ýákil týraly zań jobasyna qatysty pikir bildirdi
«Búgin Májilis depýtattary «Qazaqstan Respýblıkasyndaǵy Adam quqyqtary jónindegi ýákil týraly» zań jobasy birinshi oqylymda maquldandy. Zań jobasy 2021 jyly 15 qańtarda jetinshi shaqyrylymdaǵy Parlamenttiń birinshi sessııasynda Memleket basshysy jarııalaǵan saıası reformalardyń úshinshi paketin júzege asyrý aıasynda ázirlendi. Zań jobasy aıasynda ýákilge qol suǵylmaýshylyq mártebesi beriledi jáne onyń ókilettigi keńeıtiledi», - dep jazdy E. Qarın Telegram kanalynda.
Ombýdsmen adamnyń quqyǵy men bostandyǵyna nuqsan keltirgenderge qatysty tártiptik, ákimshilik nemese qylmystyq is qozǵaý týraly ótinishhat joldaı alady.
Sonymen qatar ol memlekettik organdardyń, ózin-ózi basqarý organdary nemese laýazym ıeleri sheshimimen jáne áreketterimen buzylǵan shektelmegen adamdar tobynyń quqyqtaryn qorǵaı otyryp, sotqa júgine alady. Munymen qosa, oblystar men respýblıkalyq mańyzdaǵy qalalarda Adam quqyqtary jónindegi ýákildiń ókildikteri paıda bolady. Olar jergilikti deńgeıde adamdardyń quqyǵy men bostandyǵyn qorǵaýǵa qyzmet etedi.
E. Qarınniń aıtýynsha, osy normalardy zańnamalyq turǵyda bekitý qajettigi Ulttyq qoǵamdyq senim keńesiniń alańynda keńinen talqylandy. Osy arqyly saıası reformalardyń prezıdenttik paketindegi taǵy bir bastamaǵa qatysty sheshim márege jetýge jaqyndady.
«Jalpy, Memleket basshysynyń saıası reformalaryn júzege asyrý aıasynda eki jylda 10 zań qabyldandy. Prezıdent belgilegen basqa da saıası bastamalar boıynsha belsendi jumystar jalǵasyp keledi», - dedi E. Qarın.