Erlan Haırov: Aqtóbe - negizgi kapıtalǵa ınvestıtsııa tartqan kóshbasshy aımaq
AQTÓBE. QazAqparat - Aqtóbe negizgi kapıtalǵa ınvestıtsııa tartqan kóshbasshy aımaq boldy. Bul týraly Aqtóbede ótken ınvestıtsııalyq forým kezinde QR Investıtsııalar jáne damý vıtse-mınıstri Erlan Haırov aıtty, dep habarlaıdy QazAqparat tilshisi.
Aqtóbede gaz, elektr qýaty arzan. «Batys Eýropa - Batys Qytaı» halyqaralyq dálizi bar. Temir jol, tas jol qatynasy taýar almasýǵa, bıznesti damytýǵa yńǵaıly. Aqtóbede ótken ınvestıtsııalyq forýmǵa qatysqan QR Investıtsııalar jáne damý vıtse-mınıstri Erlan Haırov óńirdiń artyqshylyqtaryn ózge aımaqqa úlgi etti.
«Aqtóbe oblysy negizgi kapıtalǵa ınvestıtsııa tartý kórsetkishi boıynsha respýblıkada birinshi orynda keledi. Negizi ınvestorlarǵa jaǵdaı jasaý, olardyń ár usynysyn muqııat qarap, jobanyń iske asyrylýyn qamtamasyz etý Elbasy tapsyrmasy bolatyn. Elimizdiń zańnamalary ońtaılandyrylyp, olarǵa jer berýge múmkindik jasalǵan. Sonymen qatar, úsh túrli salyqtan bosatyldy. Sheteldik ınvestorlardy memlekettik-jekeshelik seriktestik mehanızmimen jumys isteýge de shaqyramyz. Bul baǵytta Aqtóbe taǵy kóshbasshy bolyp tur. Oblys 8 qujatqa qol qoıyldy. Túrik ınvestorlarymen birlese iske asyrylyp jatqan jedel járdem stantsııasyn salý jobasyn ózge óńirlerge úlgi etip júrmiz», - dedi Investıtsııalar jáne damý vıtse-mınıstri Erlan Haırov.
Aqtóbe oblysynyń ákimi Berdibek Saparbaev forým aıasynda Italııanyń Qazaqstandaǵy Tótenshe jáne Ókiletti Elshisi Stefano Ravanıanmen kezdesti.
«Memleket basshysynyń qoıǵan basty mindetteriniń biri - elde qolaıly ınvestıtsııalyq jaǵdaı jasaý. Bul úshin óńirde maqsatty jumystar júrgizilýde. Birinshiden, sheteldik ınvestıtsııalardyń qaýipsizdigi qamtamasyz etilgen. Ekinshiden, ınvestorlarǵa qajetti qoldaý kórsetilip, Qazaqstannyń zańnamalarynda kózdelgen barlyq jeńildikter men artyqshylyqtar usynylady», - dedi oblys ákimi B.Saparbaev.
Kezdesý kezinde iskerlik baılanysty jandandyrý, ónerkásip, ınnovatsııa, dári-dármek, aýyl sharýashylyǵy, bilim jáne mádenıet salasyndaǵy yntymaqtastyqty damytý máseleleri talqylandy. Al Stefano Ravanıan ekijaqty qarym-qatynasty bekitý maqsatynda Aqtóbe qalasynan Italııa elshiliginiń ókildigin ashý máselesi qarastyrylyp jatqanyn jetkizdi.
Aıta keteıik, jyl basynan beri aımaq ekonomıkasyna shamamen 800 mıllıon dollar ınvestıtsııa tartylǵan. Forým aıasynda Aqtóbe oblysynyń ákimi Berdibek Saparbaev Birikken Arab Ámirliginen kelgen «Al-Masaood Oil and Gas» kompanııasynyń bas dırektory Ahmad al-Tannırmen kezdesti. Aqtóbe oblysy ákiminiń baspasóz qyzmetiniń habarlaýynsha, oblys basshylyǵy munaı-gaz salasyn, aýyl sharýashylyǵy, qonaq úı bıznesin, energetıka baǵytyn damytýǵa múddeli ekenin aıtty.
«Biz Aqtóbe oblysynyń damý kelesheginiń zor ekenine senimdimiz. Óńirge birneshe baǵyt boıynsha ınvestıtsııa salýǵa daıynbyz. Jobalar qorshaǵan ortaǵa zııan keltirmeıtin joǵary tehnologııalardy paıdalaný arqyly júzege asyrylatyn bolady. Biz sondaı-aq, Aqtóbe qalasynda óz kompanııamyzdyń ókildigin ashýdy josparlap otyrmyz jáne osy másele boıynsha sizderdiń qoldaýlaryńyzǵa senemiz», - dedi «Al Masaood Oil and Gas» kompanııasynyń bas dırektory Ahmad al-Tannır.
