Erlan Dákenov: Telefonnan kóz almaıtyn jas býynǵa Abaı taǵylymyn sińirýimiz kerek
Nur Sultan qalalyq ákimdiginiń Memlekettik akademııalyq fılarmonııasynyń bas dırektory Erlan Dákenov uly oıshyldyń mereıtoıy aldynda osyndaı pikir bildirdi, dep habarlaıdy QazAqparat tilshisi.
«Kúni keshe el Prezıdenti Qasym-Jomart Toqaevtyń «Abaı jáne XXI ǵasyrdaǵy Qazaqstan» atty maqalasy jaryq kórdi. Bul eńbek - uly oıshyl Abaıdyń mol murasyn búkil jurtqa pash etýdiń, kemeńgerdiń 175 jyldyǵyn joǵary deńgeıde atap ótýdiń kilti dep bilemin. Prezıdent bizge jol silteı otyra, Abaı shyǵarmalarynyń qundylyqtaryn mynaý damyǵan zamanmen salystyrady. Órkenıetti elderdiń aldynda qazaq bilimdi, bilikti, ǵylymnyń damýyna úles qosýy qajettigin aıtady. Buǵan barlyq el bolyp jumyla kirisýimiz qajet. Ásirese, kúni-túni kózin telefonnan almaıtyn bolashaq urpaqty tárbıeleýimiz kerek. Boılaryna Abaıdan qalǵan asyl murany sińirý shart. Óıtkeni, jumyla kótergen júktiń qashan da jeńil ekeni haq», - deıdi Erlan Dákenov.
Onyń aıtýynsha, jastardyń boıynda patrıottyq sezimdi, olardyń tarıhqa degen qulshynysyn oıatý úshin fılarmonııa Abaıdyń mýzyka álemine qosqan ólsheýsiz úlesin dáriptep keledi. Búgin de kompozıtordyń áýezdi ánderi Memlekettik akademııalyq fılarmonııanyń repertýarynda oıyp turyp oryn alǵan.
«Sondaı-aq, Abaıdyń 175 jyldyq mereıtoıy aıasynda óner ordasynyń ujymy, ıaǵnı 700 qyzmetker «Kózimniń qarasy» shyǵarmasyn oryndaý boıynsha chellendj uıymdastyrdy. Bul aýqymdy estafeta elimizdiń barlyq aımaǵynda jalǵasyn tapty. Abaıdyń murasyn, taǵylymyn jas urpaqqa jetkizý baǵytynda eńbegimiz jalǵasady. Kemel oıdyń kemeńgeri Abaı Qunanbaıulynyń esimi eshqashan ólmek emes. Ony búgingi urpaq ulyqtaı beredi», - deıdi ol.
Eske sala ketsek, «Egemen Qazaqstan» gazetinde QR Prezıdenti Qasym-Jomart Toqaevtyń «Abaı jáne HHІ ǵasyrdaǵy Qazaqstan» atty maqalasy jarııalanǵan bolatyn.
