Erlan Bilálden 670 myń teńgeni qaıtarý talap etildi
ALMATY. QazAqparat - Almaly aýdandyq sotynda Qazaqstan Respýblıkasynyń eńbek sińirgen qaıratkeri, M. Áýezov atyndaǵy drama teatrynyń dırektory Erlan Bilálge qatysty kezekti sot otyrysy ótti, dep habarlaıdy «QazAqparat» HAA tilshisi.
Erlan Biláldiń qorǵaýshysy taǵy da isti BAQ-tyń qatysýynsyz qaraý týraly ótinish bildirdi. Osy is boıynsha kýáger bolyp otyrǵan Qaırat Baıanovtyń qorǵaýshysy ony azamattyq talap qoıýshy dep tanýdy surady.
«Biz Baıanovty qylmystyq protseste azamattyq talap qoıýshy dep taný týraly ótinish berdik. Aıyptaý aktisimen belgilengen, onyń ústine aıyptalýshynyń ózi de joqqa shyǵarmaı otyrǵan jaıt, ol Baıanovtan 600 myń teńge mólsherinde aqsha alǵan. Biz bul aqshany ıesine qaıtarý týraly azamattyq talap qoıdyq. Jalpy shyǵyn mólsheri 600 myń teńge - Baıanov óz qarajattary esebinen bergen soma. Ol qylmystyq istiń materıaldaryna qosylǵan joq. Biz, sondaı-aq Baıanovqa keltirilgen múliktik zalaldy da qostyq, qorǵaýshy shyǵynyna50 myń teńge, osy iske qatysty kýágerge júktelgen ózge shyǵyndar úshin 21 myń teńge. Osy qarajatty óteýdi suraımyz», - dedi jýrnalısterge Qaırat Baıanovtyń qorǵaýshysy Ramılıa Muhamedıeva sot otyrysynan keıin.
Eske sala keteıik, jýrnalısterdiń aýdıojazba, foto-vıdeotúsirilimder júrgizýine tyıym salynǵan. Biraq olarǵa protseske qatysýǵa ruqsat berilgen. Sotqa sýdıa Qýanysh Arıpov tórelik etýde.
Sotqa deıingi tergep-tekserý organynyń málimetterine qaraǵanda, Erlan Bilál «Sezam» qoǵamdyq qaıyrymdylyq shyǵarmashylyq qorynyń prezıdenti Qaırat Baıanovtan M. Áýezov atyndaǵy drama teatrynda jańajyldyq spektaklder ótkizý úshin 1,5 mıllıon teńge mólsherinde para almaq bolǵan.
Qaırat Baıanov iske ázirshe kýáger retinde qatysyp otyr.
Eske sala keteıik, M. Áýezov atyndaǵy Qazaq memlekettik akademııalyq drama teatrynyń dırektory Erlan Bilál 1,5 mln teńge mólsherinde para almaq bolǵan jerinde ustalǵan. Oǵan qatysty QR QK 366-babynyń («Para alý») 2-bóligine, 24-babynyń 3-bóligine sáıkes is qozǵaldy. Buryn sot Erlan Bilálge bultartpaý sharasyn qoldanyp, kepilmen bosatqan bolatyn. Ol 1 mıllıon 205 myń teńge mólsherinde kepil tóledi.
