Erlan Bilál: «Almas qylysh» - qoǵamnyń rýhyn shyńdaıtyn fılm
ASTANA. QazAqparat - Jýyrda Qazaq handyǵynyń 550 jyldyǵy men Qazaqstan Respýblıkasy táýelsizdiginiń 25 jyldyǵyna oraı túsirilgen «Almas qylysh» fılmi qoǵamnyń rýhyn shyńdaıtyn shoqtyǵy bıik týyndy, deıdi QazAqparat tilshisimen áńgimelesken M.Áýezov atyndaǵy Qazaq memlekettik akademııalyq drama teatrdyń dırektory, ártis Erlan Bilál.
«Elimizdiń mádenıet jáne óner salasy úshin 2016 jyl - iri jobalardyń sátti júzege asqan jyly bolyp otyr. Bıyl sondaı-aq, Táýelsizdiktiń 25 jyldyǵyn atap óttik. Bıyl júzege asyrǵan jobalardyń arasynda - «Almas qylysh» fılmi shoqtyǵy bıik týyndy bolyp otyr. «Almas qylysh» - memlekettik mańyzy bar joba. Óıtkeni, bul fılm arqyly qazaq halqynyń ult bolyp, memleket bolyp qalyptasý tarıhy, sol joldaǵy tarıhı tulǵalardyń, handardyń, batyrlardyń, bılerdiń tarıhtaǵy atqarǵan sheshýshi rólderi, qazaq handyǵynyń paıda bolý kezeńindegi shıelenisti tarıhı jaǵdaılar tereń dramatýrgııamen órilip, sheber rejıssýramen kórsetilgen»,-deıdi E.Bilál.
Aıta keteıik, «Almas qylysh» - Qazaq handyǵynyń 550 jyldyǵyna oraı qolǵa alynǵan eń iri kıno joba «Qazaq eli» serıalynyń kınonusqasy.
«Almas qylysh» fılmi búgingi qoǵamǵa óziniń túp tamyryn tanýǵa, tarıhymen maqtanýǵa, memlekettik tarıhymyzdyń tamyry tereńde ekenin sezinýge jáne qaı zamanda da Táýelsizdik jolyndaǵy kúrestiń, jańa memleket qurýdyń ońaı bolmaǵanyn anyq kórsetedi. Sol arqyly ár azamattyń boıyndaǵy otansúıgishtik sezimin odan ári qýattandyryp, rýhtandyrady. Bul kınotýyndynyń ekinshi bir jaǵy ol - tárbıelik mańyzy. Búgingi jas urpaqqa mundaı iri tarıhı fılmderdiń bereri óte mol. Kınonyń aýdıtorııasynyń kóp bolatyndyǵy ári adamǵa áser etý turǵysynan zor kúshke ıe ekenin eskersek, «Almas qylysh» týyndysy Táýelsizdik jyldarynda ómirge kelgen jas býyndy patrıottyq jolda tárbıeleýdiń negizgi quralyna aınalary sózsiz. Jalpy, «Almas qylysh» tarıhı fılmi qoǵamnyń memleketshildik, Otanshyldyq sanasyn oıatyp, rýhyn shyńdaıtyn kıno joba bolǵanyn basa aıtqanymyz jón», - deıdi teatr dırektory.
Esterińizge sala keteıik, Táýelsizdik kúni qarsańynda Astana jáne Almaty qalalarynda «Almas qylysh» fılminiń tusaýkeseri ótken bolatyn.
Kınoǵa 500-ge tarta adam, 100-ge jýyq akter jumyldyrylǵan. Kórkem fılmniń rejısseri - Rústem Ábdirash. Fılm 15-ǵasyrdyń orta tusyndaǵy Qazaq handyǵynyń qurylý tarıhyn baıandaıdy.
