Erlan Bekhojın Qazaqstan Kásibı boks Federatsııasynyń prezıdenti qyzmetine saılandy (FOTO)

ALMATY. QazAqparat - Almaty memlekettik energetıka kolledjinde Qazaqstan kásibı boks Federatsııasynyń eseptik konferentsııasy ótti.

Jıyn barysynda Federatsııanyń prezıdenttigine QR Prezıdenti teleradıokompanııasynyń bas dırektory Erlan Bekhojın saılandy.

«Qazaqstan boksynyń bitim-bolmysy erekshe. Jetken jetistigimizben toqtamaýymyz kerek. Bizdiń sportshylarymyz áli de sheberligin shyńdaýy kerek. Sońǵy álem chempıonaty sony kórsetti. Kóp eldiń menedjerleri bizdiń sportshylarǵa kóz salyp júr. Endi olardan kóz jazyp qalmaı, qajetti baǵytta jumys isteý mańyzdy», - dedi bokstan Azııa Konfederatsııasynyń prezıdenti Serik Qonaqbaev.

Ol Federatsııanyń jańa basshylyǵy boks salasyn damytýǵa óz úlesin qosaryna senimin bildirdi.

Sondaı-aq, jıyn barysynda kolledjde 1980 jylǵy Olımpıadanyń kúmis júldegeri Vıktor Demıanenkonyń kásibı bokserlik klýby ashyldy.

«Búginde qatty, adýyndy shabýylǵa kóshý kerek. Mundaı zaldar kásibı rıngte jańa esimderdi estýimizge septigin tıgizedi», - dedi S.Qonaqbaev.

Kásibı arenada Qazaqstannyń namysyn qorǵap júrgen Qanat Islam klýb tárbıelenýshilerine sheberlik saǵatyn ótkizdi.