Erlan Baıdáýlet Azyq-túlik qaýipsizdigi jónindegi ıslam uıymynyń bas dırektory boldy
27-29 tamyzda Saýd Arabııasynda «Azyq-túlik qaýipsizdigi arqyly ıslamdyq yntymaqtastyqty arttyrý» taqyrybynda Azyq-túlik qaýipsizdigi jónindegi ıslam uıymy Bas assambleıasynyń (AQIU) 2-shi sessııasy ótti. Qazaqstan delegatsııasyn Aýyl sharýashylyǵy mınıstri Saparhan Omarov basqardy.
«Sessııanyń kún tártibine sáıkes IYU-ǵa múshe memleketterdegi azyq-túlik qaýipsizdiginiń jaı-kúıi týraly málimetter bazasyn qurý men uıym keńistigindegi yntymaqtastyqty yntalandyrý úshin aımaqtyq azyq-túlik qaýipsizdigi rezervi, astyq qoryn qurýǵa baǵyttalǵan 3 jyldyq is-shara josparyn ázirleý men AQIU ınvestıtsııalyq baǵdarlamasynyń engizilýi sııaqty máseleler qarastyryldy», delingen habarlamada.
Otyrystyń qorytyndysy boıynsha Qazaqstan ókili Erlan Baıdáýlet osy uıymnyń jańa Bas dırektory bolyp saılandy. Sondaı-aq Qazaqstan, Saýd Arabııasy, Birikken Arab Ámirlikteri, Túrkııa, Býrkına-Faso, Gambııa jáne Bangladeshtiń aýyl sharýashylyǵyna jaýapty mınıstrlikteriniń ókilderi AQIU Atqarýshy Keńesiniń músheleri bolyp saılandy.
Sonymen qatar, is-shara barysynda Nıgerııa AQIU jarǵysyna qol qoıyp, uıymnyń 34-shi múshesi boldy.
AQIU Bas Assambleıasy qabyldaǵan qorytyndy qujatta qatysýshylar QR Tuńǵysh Prezıdenti - Elbasy Nursultan Nazarbaevqa musylman áleminiń azyq-túlik qaýipsizdigin qamtamasyz etýdegi erekshe rolin joǵary baǵalady.
Sonymen qatar, uıym músheleri Qazaqstan Prezıdenti Q.Toqaevqa, Úkimeti men halqyna AQIU qyzmetin men damýyna kórsetip otyrǵan qoldaýlary úshin alǵystaryn bildirdi.
Buǵan qosa qatysýshylar AQIU-nyń qurylymdyq damýyna kómek retinde 2 mln. AQSh dollaryn bólý jónindegi sheshimi úshin Saýd Arabııasynyń Koroli Salman ben Ábdel-Azız Ál Saýdqa rızashylyǵyn aıtyp, Jıddada ótken Bas Assambleıanyń 2-shi sessııasy uıymnyń nyǵaıýy men qalyptasýyna úlken serpin beretinin atap ótti.
Basqosý barysynda Astyq qory jáne Agrarlyq óndirýshilerdiń ıslamdyq birlestigin qurý týraly Qazaqstan aýyl sharýashylyǵy mınıstri S.Omarov kótergen bastamalar qoldaý tapty. Buǵan qosa, musylman elderine gýmanıtarlyq astyq jáne qurbandyq mal jobalaryn júzege asyrý, musylman elderiniń azyq-túlik qaýipsizdigin qamtamasyz etý barysynda ıslamdyq qarjylandyrý bankınginiń tetikterin, halyqaralyq zeket, sadaqa qorlarynyń múmkinshilikterin jáne osy salalardaǵy zamanaýı ozyq ǵylymı tehnologııalardy paıdalaný sııaqty qazaqstandyq bastamalardyń ózektiligi aıqyndala tústi.
Іs-shara aıasynda mınıstr S.Omarov birqatar elderdiń delegatsııalary basshylarymen ekijaqty kelissózder ótkizdi.
Atap aıtqanda, Saýd Arabııasynyń Qorshaǵan orta, sý resýrstary jáne aýyl sharýashylyǵy mınıstri Abdrahman ál-Fadlımen, Bangladesh Respýblıkasynyń Azyq-túlik mınıstri S.G.Majýmdermen, Mysyr Arab Respýblıkasynyń Aýyl sharýashylyǵy jáne melıoratsııa mınıstri A.Satıtpen, Aýǵanstan Islam Respýblıkasynyń Aýyl sharýashylyǵy, ırrıgatsııa jáne mal sharýashylyǵy mınıstri N.Dýranımen, sondaı-aq, Túrkııa, Indonezııa delegatsııalarynyń basshylarymen jáne Saýdtyq aýyl sharýashylyǵy jáne mal sharýashylyǵy salasyndaǵy ınvestıtsııalyq kompanııa basshysy M.Jensenmen kezdesti. Olardyń barysynda AQIU sheńberinde ózara yntymaqtastyqty damytý, uıym qyzmetin belsendirý boıynsha pikir almasylyp, ekijaqty ınvestıtsııalyq jáne saýda-ekonomıkalyq baılanystardy, sonyń ishinde aýyl sharýashylyǵy salasyndaǵy ózara yqpaldastyqty keńeıtý joldary qaraldy.
