Erlan Aıtahanov Shymkenttiń jańa jyldyq shyrshasynyń shamyn jaqty

ShYMKENT. QazAqparat – Búgin Shymkent qalasynyń ákimi Erlan Aıtahanov saltanatty túrde megapolıstiń jańajyldyq bas shyrshasynyń shamyn jaqty. Əl-Farabı alańyndaǵy jańajyl qarsańyndaǵy sharaǵa jınalǵan jurtshylyq Aıaz Ata men Aqshaqar bastaǵan san túrli qoıylymdardy tamashalady, dep habarlaıdy QazAqparat tilshisi.

Mıllıondy qalanyń turǵyndaryn aldaǵy Jańa jyl merekesimen quttyqtaǵan shahar basshysy barsha búldirshinderdiń armany oryndalyp, maqsatyna jetýine tilektestik bildirdi.

«Jańa jyl - kez kelgen halyqtyń zor qýanyshpen asyǵa kútetin mereıli merekesi. Keler jyl súıikti qalamyz úshin mańyzdy jyl. El bolyp, barshamyz jumylyp TMD elderiniń mádenı astanasy jylyn abyroımen atqarýǵa tıispiz. Qaıyrymdy qalamyzǵa keletin ár týrıst erekshe áser alýy kerek. Bul merekeni ásirese kishkentaı búldirshinder asyǵa kútedi. Búginde elimizde balalardyń tıisti deńgeıde bilim alýyna barynsha jaǵdaı jasalyp keledi. Sol bilimimizdi ıgi iske jumsap, Qazaqstannyń damýyna úles qosýymyz qajet. Al, qaıyrymdy bolmaı qaıyrly isterdi júzege asyrý múmkin emes. Sondyqtan da biz shymkenttikter «Qaıyrymdy qala» ataýyna laıyq bolýymyz shart», - dedi Erlan Aıtahanov.

Merekelik sharada qala turǵyndary ertegi keıipkerleriniń keıpine engen úlken qýyrshaqtardyń qatysýymen ótken teatrlandyrylǵan qoıylymdy jáne otshashýdy tamashalady.

Aıta keteıik, Shymkenttegi bas shyrshanyń bıiktigi 14 metr. Al, salmaǵy 3 tonnaǵa jýyq. Bas shyrshany bezendirýge jalpy uzyndyǵy 1 myń metr jaryqshamdar men 150 dana altyn shar, 120 túrli oıynshyq jumsalǵan.