Aqkenjenov: Zaısannan taǵy gaz tabylsa, Qytaıǵa eksporttaýymyz múmkin

ASTANA. KAZINFORM — Energetıka mınıstri Erlan Aqkenjenov Úkimet otyrysynan keıin ótken baspasóz máslıhatynda Zaısan aýdanyndaǵy Sarybulaq kenishiniń mańynda qosymsha gaz barlaý jumystary júrip jatqanyn aıtty.

Jýrnalıster barlaý qorytyndysy boıynsha gaz qory bar ekeni belgili bolsa, taǵy da Qytaıǵa eksporttala ma dep surady.

— Endi ony anyqtalatyn gaz qory boıynsha qarastyrý kerek. Nege deseńiz Zaısan óńirinde gaz jetkilikti dep aıtýǵa kelmeıdi. Sol úshin, árıne, birinshi ishki naryqqa alýdy qarastyramyz, — degen mınıstr naqty sheshim qabyldaý úshin qosymsha barlaý jumystarynyń qorytyndysyn kútý kerektigin jetkizdi.

Mınıstr gaz tabylǵan jaǵdaıda ishki naryqqa jiberiletinin aıtty.

— Birinshi gaz tabý kerek. Tabylǵan jaǵdaıda ishki naryqqa jiberemiz. Jańa kólemder tabylǵan kezde neshe paıyzyn ishki naryqqa, neshe paıyzyn eksportqa shyǵaratynymyzdy anyqtaý úshin kelisimshart júrgizemiz. Birinshiden, ol kommertsııalyq, ekonomıkalyq zań, salalarǵa sáıkes keledi. Óıtkeni qosymsha qordy izdeýge shyǵyn jumsaıdy ǵoı, — dedi ol.

Jýrnalıst «Gaz tabylyp jatsa, qory úlken bolsa, qytaıǵa eksporttalýy múmkin be» dep naqtylady.

Erlan Aqkenjenov birinshi kezekte Zaısan aýdany men oǵan irgeles jatqan aýdandardy gazdandyrý máselesine basymdyq beriletinin aıtty.

— Qytaıǵa eksporttalýy múmkin. Biraq birinshi maqsatymyz — ishki naryqty qamtamasyz etý. Zaısannan bólek Tarbaǵataı, Kókpekti jáne basqa da aýdandar bar. Naqty neshe aýdanǵa gaz tartylatynyn aıtý úshin áýeli qosymsha barlaý kezinde gaz qory tabylý kerek, — dedi mınıstr.

Atalǵan jıynda Reseı Ózbekstanǵa Qazaqstan arqyly eksporttaıtyn gazdyń kólemin 11 mlrd tekshe metrge deıin ulǵaıtatyny belgili boldy.