Erlan Aqkenjenov tehnologııalyq buzýshylyqtar artqan energııa nysandaryn atady
ASTANA. KAZINFORM – Bıyl 7 aıda elektr stantsııalarynda 891 tehnıkalyq buzýshylyq anyqtaldy. Bul týraly búgin Úkimet otyrysynda Energetıka mınıstri Erlan Aqkenjenov aıtty.
- Aldaǵy jylytý maýsymyna daıyndyq aıasynda Júıelik operator bekitken kestege sáıkes, bıyl elektr stantsııalarynda 9 energııa blogyn, 55 qazandyqta jáne 51 týrbınany jóndeý josparlanǵan. Qazirgi ýaqytta 3 energııa blogynda, 33 qazandyqta jáne 24 týrbınada jóndeý jumystary ártúrli kezeńderde júrgizilip jatyr. Aǵymdaǵy jyly jóndeý jumystaryna 384 mlrd teńge kózdelgen. Bul ótken jyldyń deńgeıinen 9 paıyzǵa joǵary, - dedi ol.
Mınıstrdiń aıtýynsh, óńirlik elektrjelilik kompanııalardyń elektr jelilerinde jalpy uzyndyǵy 17,1 myń shaqyrym elektr berý jelilerin jáne 444 qosalqy stantsııany jóndeý josparlanǵan. Búgingi tańda elektr berý jelileriniń 91 paıyzyn jáne qosalqy stantsııalardyń 84% paıyzyn jóndeý aıaqtaldy. Jylýmen jabdyqtaý jelilerinde 377 shaqyrym jylý jelilerin rekonstrýktsııalaý jáne kúrdeli jóndeý jumystaryn júrgizý kózdelgen. Onyń 246 shaqyrymy nemese 65 paıyzy oryndaldy.
- Osy jyldyń 7 aıynyń qorytyndysy boıynsha elektr stantsııalaryndaǵy tehnologııalyq buzýshylyqtar sany 5,6 paıyzǵa tómendep, 891 jaǵdaıdy qurady. Sonymen qatar «GRES Topar», «Astana-Energııa» Jylý energııa ortalyǵy-2, Shymkent qalasyndaǵy «Energoortalyq-3» jáne Aqsý qalasyndaǵy GRES-te tehnologııalyq buzýshylyqtardyń ósýi baıqalady. Atalǵan tehnologııalyq buzýshylyqtar boıynsha Energetıkalyq qadaǵalaý komıteti óz quzyreti aıasynda tıisti tergep-tekserý jumystaryn júrgizip, qajetti sharalardy qabyldady, - dedi Erlan Aqkenjenov.
Aıta keteıik, otyrysta Úkimet basshysy Oljas Bektenov ońtústik óńirlerdiń elektr energııasy senimdiligin kúsheıtýdi tapsyrdy.
