Erlan Aqkenjenov «Kómir generatsııasyn damytý» jobasynan kútiletin nátıjelerdi atady
ASTANA. KAZINFORM — «Kómir generatsııasyn damytý» ulttyq jobasyn iske asyrý nátıjesinde kómir elektr stantsııalarynda lastaýshy zattar shyǵaryndylary 34 paıyzǵa qysqartylady. Bul týraly Úkimet otyrysynda Energetıka mınıstri Erlan Aqkenjenov aıtty.
Onyń aıtýynsha, «Kómir generatsııasyn damytý» ulttyq jobasyn iske asyrý aıasynda kómir generatsııasynyń ekologııalyǵyn jáne tıimdiligin arttyrýǵa baǵyttalǵan «taza kómir» tehnologııasyn qoldanýǵa asa nazar aýdarylylady. Bul baǵytta paıdaly is-qımyldyń joǵary koeffıtsıentin jáne úlestik shyǵaryndylardy azaıtýdy qamtamasyz etetin ozyq tehnologııalyq sheshimderdi paıdalana otyryp, tıimdiligi joǵary kómir elektr stantsııalaryn salý kózdeledi.
— Sonymen qatar qatty bólshekterdi jáne aýyr metaldardy ustaı otyryp tereń súzgileý tehnologııalaryn qosa alǵanda, tútin gazdaryn tazartýdyń zamanaýı júıelerin engizý qamtamasyz etiledi. Bul qorshaǵan ortaǵa teris áserdi edáýir azaıtýǵa múmkindik beredi. Kómirdi gazdandyrýdy damytý jeke perspektıvaly baǵyt sanalady. Bul kómir resýrstaryn barynsha ekologııaly paıdalaný úshin múmkindikter ashady. Atalǵan sharalardy iske asyrý kómir generatsııasynyń sapaly jańa tehnologııalyq deńgeıge ótýin qamtamasyz etýge, onyń básekege qabilettiligin arttyrýǵa jáne ekonomıkalyq damý men ekologııalyq talaptar arasyndaǵy tepe-teńdikti qamtamasyz etýge múmkindik beredi, — dedi mınıstr.
Erlan Aqkenjenovtiń málimetinshe, ulttyq jobany iske asyr mynadaı nátıjelerge qol jetkizýge múmkindik beredi:
— negizgi óndirýshi jabdyqtyń tozý deńgeıi tómendep, energııa júıesiniń senimdiligi artady;
— kómir elektr stantsııalarynda lastaýshy zattar shyǵaryndylary 34 paıyzǵa qysqartylady;
— salanyń ekologııalyq turaqtylyǵy qamtamasyz etilip, «taza kómirdiń» zamanaýı tehnologııalary engiziledi;
— kómir elektr stantsııalarynyń energııa tıimdiligi arttyrylady jáne elektr energııasyn óndirýge jumsalatyn úlestik shyǵyndar azaıady;
— jańa jumys oryndary qurylyp, sondaı-aq ónerkásiptik jáne ilespe ınfraqurylymy damytylady.
Aıta ketelik Qazaqstan kómiri qaı elderge eksporttalatyny týraly jazǵan edik.
