Erlan Aqkenjenov: Elde ornatylatyn 4 mln «aqyldy eseptegish» 57 mlrd teńgeni únemdeıdi
ASTANA. KAZINFORM – Energetıka mınıstri Erlan Aqkenjenov Úkimet otyrysynda elektr energııasyn esepke alýdyń zııatkerlik júıesi keńeıtiletinin aıtty.
- Energetıkalyq jáne kommýnaldyq sektorlardy jańǵyrtýdyń Ulttyq jobasyn (EKSJ) iske asyrý sheńberinde elektr energııasyn esepke alýdyń zııatkerlik júıelerin qamtý úlesin ulǵaıtý josparlanyp otyr.
Osyǵan baılanysty Ulttyq joba sheńberinde elektrmen jabdyqtaýdyń 27 sýbektisin shamamen 4 mıllıon «aqyldy» esepke alý aspaptarymen jaraqtandyrý josparlanǵan, - dedi ol.
Erlan Aqkenjenov osynyń arqasynda elektr energııasynyń normatıvtik shyǵyndaryn azaıtý esebinen 57 mlrd teńge únemdeletinin aıtady.
Aıta keteıik, búgingi Úkimet otyrysynda elektr energetıkasy salasyn damytý men tsıfrlandyrý barysy talqylanyp jatyr.