Erlan Aqkenjenov EAEO ortaq energetıkalyq naryǵynyń perspektıvasy týraly aıtty

Mınıstrdiń pikirinshe, seriktestik qatynastardy damytý jáne saýdanyń biryńǵaı algorıtmderin qalyptastyrý senimdilikke, retteýdiń boljamdylyǵyna jáne ózara tıimdilikke negizdelýi tıis.

Munaı, munaı ónimderi, gaz jáne elektr energııasy boıynsha ortaq naryqtardy kezeń-kezeńimen qalyptastyrý máselesine toqtalǵan Mınıstr konstrýktıvti makroekonomıkalyq ustanymdy atap ótti.

Bul ashyq energetıkalyq keńistikti damytý bolashaqtaǵy makroóńirlik ıntegratsııaǵa jasalǵan senimdi qadam retinde qarastyrylady. Sonymen qatar, tıimdi nátıjege qol jetkizý úshin memleketter bul jumysty bir-biriniń ulttyq múddelerin, qoldanystaǵy ekijaqty kelisimderdi mindetti túrde eskere otyryp jáne óz azamattary men ónerkásibin senimdi qamtamasyz etý basymdyǵyn saqtaı otyryp úılestirýi qajet.

-Biz shynaıy turaqty, realıstik ári ózara tıimdi tetikter qalyptastyrylǵan jaǵdaıda eýrazııalyq energetıkalyq ıntegratsııanyń keń múmkindikterin kórip otyrmyz. Dál osyndaı pragmatıkalyq ári jan-jaqty eseptelgen birlesken jumys Odaǵymyzdyń uzaq merzimdi irgetasyn qalyptastyryp, ortaq naryqtyq úderisterdi jasandy nemese formaldy jedeldetýge baılanysty táýekelderden qorǵaıdy, — dep atap ótti Erlan Aqkenjenov.

Ortaq turaqty energetıkalyq arhıtektýrany qalyptastyrýdyń mańyzdy negizi — Odaq elderi arasynda búginde qalyptasqan berik praktıkalyq baılanystar. Qazirgi tańda Qazaqstan Reseı Federatsııasymen munaı-gaz kesheni men elektr energetıkasy salasynda nátıjeli yntymaqtastyq ornatqan, sondaı-aq Qyrǵyz Respýblıkasymen sý-energetıkalyq teńgerimdi tabysty úılestirip otyr. Sonymen qatar Belarýs pen Armenııadaǵy seriktestermen ınfraqurylymdy jańǵyrtý máseleleri boıynsha saraptamalyq tájirıbe almasý jolǵa qoıyldy.

EAEO-nyń bolashaq naryqtarynyń turaqtylyǵyn qamtamasyz etetin mańyzdy faktorlardyń biri joǵary tehnologııalardy damytý bolýy múmkin.

Memleket basshysy Qasym-Jomart Toqaev jarııalaǵan Tsıfrlandyrý jáne jasandy ıntellekt jyly Qazaqstannyń energetıka salasy úshin naqty tájirıbege aınaldy. Búginde jasandy ıntellekt tehnologııalary otandyq energetıkanyń barlyq negizgi baǵyttaryna belsendi engizilip jatyr. Osy tájirıbege súıene otyryp, Mınıstrlik seriktesterdi zamanaýı IT-sheshimderdi EAEO-nyń ortaq naryǵyna keńinen engizýge shaqyrady. Dıspetcherlik boljaý deńgeıinde jasandy ıntellekt elementterin qoldaný Odaq memleketterine eń joǵary júkteme kezeńderinde óz energetıkalyq júıelerin qaýipsiz ári tıimdi basqarýǵa, ulttyq múddeler teńgerimin tolyq saqtaýǵa múmkindik beredi.

Osyǵan deıin Qazaqstan men Reseıdiń energetıkalyq áriptestigi qalaı damyp kele jatqany týraly materıal jarııaladyq.