Erlan Aqkenjenov: Bıyl gaz óndirý kólemi 64,5 mlrd tekshe metrge jetedi
ASTANA. KAZINFORM – Jyl basynan beri elimizde 31,4 mlrd tekshe metr gaz óndirilgen. Bul týraly Úkimet otyrysynda QR Energetıka mınıstri Erlan Aqkenjenov málimdedi.
Mınıstrdiń aıtýynsha, bıyl gaz óndirý kólemi 64,5 mlrd tekshe metrge jetedi bolady dep josparlanyp otyr.
– Gaz salasyndaǵy basym mindetterdiń biri – jańa ınfraqurylymdyq jobalardy iske asyrý. Jyl sońyna deıin «Beıneý–Bozoı–Shymkent» magıstraldy gaz qubyrynyń ekinshi jelisiniń birinshi kezeńi boıynsha jelilik bóliktiń qurylysyn aıaqtaý josparlanyp otyr. Bul jobany iske asyrý bolashaqta gaz tasymaldaý ınfraqurylymyn keńeıtýge jáne óńirlerdi turaqty gazben qamtamasyz etýge múmkindik beredi, – dedi ol.
Erlan Aqkenjenovtiń aıtýynsha, alty aıdyń qorytyndysy boıynsha taýarlyq gaz óndirý kólemi 12,2 mlrd tekshe metrge jetti. Sonymen qatar mınıstr kómir óndirisine de toqtaldy.
– Qańtar-maýsym aılarynda kómir óndirý kólemi 58,9 mln tonnany qurady. Bul ótken jyldyń sáıkes kezeńindegi kórsetkishtiń 112,4 paıyzyn kórsetti. Jyldyq boljam – 128,9 mln tonna, – dedi ol.
Jalpy, tórt aıda kómir eksportynyń kólemi 10,1 mln tonna boldy. Bul ótken jyldyń sáıkes kezeńimen salystyrǵanda 104,1 paıyz. Al jyldyq eksport boljamy – 33,2 mln tonna.
Aıta keteıik, elimizde gaz salasyn tsıfrlandyrý aıasynda tutynýshylarǵa arnalǵan jańa onlaın servıster engizilip, gaz taratý jelileriniń 91%-y tsıfrlyq formatqa kóshirildi.
