Erlan Aqkenjenov Aleksandr Novakqa II dárejeli «Dostyq» ordenin tabystady
ASTANA. KAZINFORM- Qazaqstan Respýblıkasynyń Energetıka mınıstri Erlan Aqkenjenov Máskeýde Reseı Federatsııasy Úkimeti Tóraǵasynyń orynbasary Aleksandr Novakpen kezdesý ótkizip, oǵan Qazaqstan Prezıdenti Qasym-Jomart Toqaevtyń atynan II dárejeli «Dostyq» ordenin tabystady.
QR Energetıka mınıstrligi baspasóz qyzmetiniń habarlaýynsha, nagrada qoǵamdaǵy ózara kelisimdi saqtaýǵa baǵyttalǵan jemisti jumysy, eki halyq arasyndaǵy beıbitshilik, dostyq pen yntymaqtastyqty nyǵaıtýǵa qosqan úlesi úshin berildi.
Kezdesý barysynda taraptar otyn-energetıka keshenindegi ekijaqty yntymaqtastyqtyń ózekti máseleleri men perspektıvalaryn, sondaı-aq energetıka salasyndaǵy ózara tıimdi is-qımyldy odan ári damytý múmkindikterin talqylady.
-Reseı men Qazaqstan arasynda strategııalyq áriptestik pen tatý kórshilik qarym-qatynastar qalyptasqan. Otyn-energetıka keshenindegi yntymaqtastyq ekijaqty kún tártibindegi negizgi baǵyttardyń biri bolyp tabylady jáne kópjyldyq birlesken jumys tájirıbesine negizdelgen,-delingen habarlamada.
Aıta keteıik, búgin Qazaqstan Premer-mınıstriniń orynbasary – ulttyq ekonomıka mınıstri Serik Jumanǵarın Reseıdiń Lenıngrad oblysynyń gýbernatory Aleksandr Drozdenkomen kezdesti.
