Erlan Ábil: Memlekettik qyzmetshiler qazaq tilin óz deńgeıinde bilýi kerek
Qazaqstan halqy tilderi kúnine oraı ótken sharanyń alǵysózin akademııa rektory Erlan Ábil bastap, memlekettik tildiń mártebesine jáne keleshektegi tilimizdiń qoldanys aıasyn damytý memlekettik qyzmetshilerdiń negizgi mindetteriniń biri ekenine toqtalyp ótti.
«Tilge degen qurmet árqaısymyzdyń júregimizdiń tórinen oryn alýy qajet. Memlekettik qyzmetshiler qazaq tilin óz deńgeıinde bilýi kerek. Osy oraıda Akademııada memlekettik tilge basa nazar aýdarylady. Kóp jyldyq tájirıbege súıenip, «Memlekettik qyzmetshilerdiń memlekettik tildi oqytý tujyrymdamasyn» ázirlep, onyń negizinde arnaıy Qazaq Resmi Test jasadyq. Qazirgi tańda QRT elimizdegi aýqymdy jobalarda qoldanylyp, tıimdiligin kórsetip keledi. Azamattar qalaǵan ýaqytynda eshqaıda barmaı-aq, www.qrt.kz saıt arqyly tildi bilý deńgeıin anyqtaı alady. Akademııaǵa oqýǵa túsýshiler qujat tapsyrǵanda mindetti túrde memlekettik tildi bilý deńgeıin rastaıtyn sertıfıkat tapsyrýy qajet. Memlekettik qyzmet salasynda memlekettik tildiń qoldanys aıasyn barynsha keńeıtý jáne nasıhattaý árqashan ózekti bolmaq», – dedi rektor.
Sondaı-aq merekelik is-sharada Memlekettik qyzmet isteri agenttiginiń apparat basshysy Álibek Ahmedıarov quttyqtaý sóz sóılep, agenttiktiń uıymdastyrýymen ótken «Eń úzdik shyǵarma» baıqaýynyń jeńimpazdaryn marapattady. «Eń úzdik shyǵarma» baıqaýyna belsendi qatysqany úshin Gúljahan Úsenova «Alǵys hatpen» marapattalady. Akademııanyń Basqarý ınstıtýtynyń magıstranty Dınara Júnisova ІІІ oryndy, Akademııanyń Memlekettik basqarýda jobalyq menedjmentti damytý ortalyǵynyń basshysy Janar Taıjanova júldeli ІІ oryndy, Agenttiktiń Jurtshylyqpen baılanys departamentiniń bas sarapshysy Gaýhar Erqanatqyzy І oryndy ıelendi.
Tildik quzyrettilikti damytý kabınetiniń uıymdastyrýymen ótken merekelik keshke Astana qalasy ákimdiginiń mýzykalyq jas kórermen teatrynyń ónerli akterleri men ánshileri kelip, kórermenderge rýhanı-tanymy mol shyǵarmalaryn oryndap, jaqsy kóńil-kúı syılady. Sonymen qatar Akademııanyń Modýldik oqytý boıynsha «Memlekettik basqarý» jáne «Óńirlik damý» mamandyqtarynyń magıstranttary belsendilik tanytyp, ónerlerin kórsetti.
