Erli-zaıyptyny óltirip, kelinshekti kepilde ustaǵan sottalýshy ómiriniń sońyna deıin túrmede otyrady
AQTÓBE. KAZINFORM — 39 jastaǵy Sársenbek Basanov ómir boıyna bas bostandyǵynan aıyryldy. Ol 20 mln teńge moraldyq, 7,3 mln teńge materıaldyq shyǵyndy óteıdi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda sot úkimi shyqty.
— Sársenbek Basanovqa Qylmystyq kodekstiń 107 baby 1 bóligimen 1 jyl merzimge bas bostandyǵynan aıyrý jazasy, 126 baby 2 bóligi 3,4 tarmaqtarymen 2 jyl 6 aı, 99 baby 2 bóligi 1, 3, 5 tarmaqtarymen ómir boıyna bas bostandyǵynan aıyrý jazasy taǵaıyndalsyn. Túpkilikti ómir boıyna bas bostandyǵynan aıyrý jazasy taǵaıyndalsyn. Jazasyn óteý orny — qylmystyq atqarý júıesiniń tótenshe qaýipsiz mekemesi. Jábirlenýshi Eleonora Álıdiń azamattyq talap arazy ishinara qanaǵattandyrylyp, S. Basanovtan 7 353 500 teńge materıaldyq, 20 mln teńge moraldyq shyǵyn, 500 myń teńge zańdy ókilge jumsaǵan shyǵyn óndirilsin, — dedi sýdıa Jánibek Seıitjaparov.
Sottan soń jábirlenýshiler úkimmen kelisetinin aıtty.
— Biz 6 aı júrdik osy ispen. Jyndy bolyp kete jazdadyq. Atý jazasy bolsa, atý jazasyn surar edik. Árıne kelisemiz, ómir boıyna bas bostandyǵynan aıyrdy. Qolymen istegenin, moınymen kótersin, — dedi jábirlenýshi E.Álı.
Eske salsaq, bıyl 13 qańtar kúni Aqtóbede er adam áıeldi kepilge aldy. Oqıǵa ornynda bolǵan úsh adamnyń ekeýi kóz jumdy. Bireýi aýrýhanaǵa tústi. Birden qylmystyq is qozǵalyp, tergeý júrdi. Kepilde bolǵan áıel birneshe kún aýrýhanada em qabyldady.
Eki apta buryn sot aldy tyńdaýy ótip, aıyptalýshyǵa Qylmystyq kodekstiń «Adam óltirý», «Bas bostandyǵynan zańsyz aıyrý», «Densaýlyqqa qasaqana aýyrlyǵy ortasha zııan keltirý» baptary boıynsha aıyp taǵyldy. Sotta jábirlenýshi, kepilde bolǵan kelinshek óz nusqasyn, sonymen birge sottalýshy óz nusqasyn aıtty. Sottalýshy S. Basanov taǵylǵan aıypty ishinara moıyndady.