Erli-zaıyptyny óltirdi degen kúdikke ilingender Indonezııadan Atyraýǵa jetkizildi
ATYRAÝ. KAZINFORM — Atyraý oblysy Jangeldın aýylynda ata-enesin óltirdi degen kúdikke ilingen Sultan Sarsemalıev pen onyń burynǵy jubaıy, marqumdardyń qyzy Aqbaıan Muqanǵalıeva búgin Atyraý qalasyna jetkizildi.
Olar Almaty-Atyraý baǵytymen ushyp kelgen.
Kúdiktiler aqpan aıynyń sońynda Indonezııa Respýblıkasynyń Lombok aralyndaǵy Senarý aýylynda ustalǵan edi.
Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
Keıin olardyń denelerinde pyshaq izderi bary belgili boldy.
9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde anyqtaldy.
Sondaı-aq joǵalǵan otbasy týraly tyń derekterdi áleýmettik jeli arqyly taratqan hakerge halyqaralyq izdeý jarııalandy.
Aqpan aıynyń basynda kúdiktiń 5 balasy memleket qamqorlyǵyna alyndy.
Qandy qylmysqa qatysy bolýy múmkin degen kúdikke sol úıdiń qyzy da ilindi.
Keıin eki kúdiktiniń shetelde qalaı ustalǵany jóninde vıdeo jarııalandy.