Túrik otbasy avtobýspen Ankaradan Astanaǵa kóshpendiler oıynyna kele jatyr
ANKARA. KAZINFORM — Erli-zaıyptylar qoldan úıge aınaldyrǵan jeke avtobýsymen Dúnıejúzilik kóshpendiler oıynyn tamashalaý úshin Ankaradan Astanaǵa jolǵa shyqty, dep jazady Anadoly.
1982 jylǵy kóne avtobýsqa mingen Idıl men Býrak Dýran eki jasar ulymen birge 8-13 qyrkúıekte Qazaqstanda ótetin V Dúnıejúzilik kóshpendiler oıynyna bara jatyr.
Klınıkalyq psıholog Idıl Dýran men aǵash ustasy Býrak Dýran eki jasar uly Gúnesh Kýtlýhanmen birge Ystanbuldaǵy kúndelikti tirshiligin ýaqytsha tastap, 9 aıdan beri «Kóshpendi» dep atalatyn avtobýsta ómir súrip keledi.
1982 jyly shyqqan jolaýshylar avtobýsyn treılerge aınaldyrǵan Dýran otbasy «Ol qaı jaq» dep atalatyn áleýmettik jelidegi paraqshasynda kúndelikti ómiri men saıahatynan syr shertedi.
Saparyn el astanasy Ankaradan bastaǵan Dýrandar Astanaǵa deıin 5400 shaqyrym joldy júrip ótýi kerek.
Anadoly agenttiginiń tilshisine Býrak Dýran avtobýstan kerýen jasap, ony baspanaǵa aınaldyrǵanyn jáne bul shytyrman oqıǵanyń úsh jylǵa sozylǵanyn aıtady.
«Kóshpendiler oıynynyń bıyl Qazaqstanda ótetinin estip, nege „Kóshpendi“ dep atalatyn avtobýsymyzben alys saıahatqa shyqpasqa degen oıǵa keldik. Ras, aldymyzda uzaq jol bar. Bul oıymyzdy estigenderdiń bári „jyndysyńdar ma?“ dep jatyr. 5 myń 400 shaqyrymdy júrip ótý ońaı emes. Kóligimizde ony-muny kem-ketik boldy, jolǵa shyǵar aldynda bárin jóndep aldyq. Jóndep jatqan mehanık sheberler de Qazaqstanǵa baratynymyzdy estigende tań-tamasha boldy», — deıdi Býrak Dýran.
Idıl Dýrannyń aıtýynsha, olar Túrkııadan Grýzııaǵa, odan keıin Reseıge ótip, Tatarstan arqyly Qazaqstanǵa jetpek.
«Ulymyzben birge búkil Ortalyq Azııany aralaımyz. Osy tusta kózime jas kelip, biraz tolqyp turmyn. Óıtkeni meniń shyqqan jerim — Ortalyq Azııa», — deıdi Idıl.
Idıl Dýran avtobýsty kerýenge aınaldyrý protsesin jáne óz ómirindegi ózgeristerdi bylaı áńgimeleıdi:
«Bul mashaqat úsh jylǵa sozyldy, biraq soǵan tatıdy. Biz Ystanbuldaǵy úıdi kilttedik te, treılerge kóshtik. Buryn da biraz saıahattap, kempke baratyn demalýshy da, jaıaý týrıst te bolyp úlgergenbiz. Alaıda qazir áldeqaıda yńǵaıly — úıimizden shyqpaı-aq elimizdi aralap júrmiz. Eki jasar ulymyz árqashan bizben birgen. Osylaısha biz oǵan elimizdiń sulýlyǵyn, jer-jerdegi mádenıetti kórsetip, halyqpen qoıan-qoltyq aralastyryp, qyzyq ári tárbıelik máni zor ómirmen tanystyryp jatyrmyz. Treılermen saıahattaý — shynymen de tamasha jaılylyq syılaıdy. Toǵyz aıdan beri syrtta júrmiz, qazir páterge kirgende birtúrli ókpemiz qysylyp, syımaı ketemiz. Bul bizdiń balamyz da osylaı erkin bolyp erjetedi degen úmit beredi».
Eske sala keteıik, Astanada ótetin Dúnıejúzilik kóshpendiler oıynynyń bastalýyna 12 kún qaldy.
