Eriktilerdiń eńbegi memlekettik qyzmetke ornalasý barysynda eskeriledi
ASTANA. KAZINFORM — Eriktilerdiń eńbegi memlekettik qyzmetke ornalasý barysynda eskeriledi. Bul týraly Úkimet otyrysynda Premer-mınıstrdiń orynbasary — Mádenıet jáne aqparat mınıstri Aıda Balaeva aıtty.
— Buqaralyq aqparat quraldary salasyndaǵy zańnamany jetildirý jumysy jalǵasyp jatyr. Atap aıtqanda, sóz erkindigi, tsenzýraǵa jol bermeý, azamattardyń aqparatty alý jáne taratý quqyǵy qaǵıdattaryn jan-jaqty ári naqty aıqyndaý kózdelip otyr. Sonymen qatar, ar-namysty, qadir-qasıetti jáne iskerlik bedeldi qorǵaýǵa baǵyttalǵan quqyqtyq tetikter kúsheıtiledi. Bul pikir bildirý erkindigi men adamnyń konstıtýtsııalyq quqyqtaryn qorǵaý arasyndaǵy tepe-teńdikti qamtamasyz etýge múmkindik beredi. Otbasy saıasatyna erekshe mán berilip otyr. Óıtkeni berik otbasy — qýatty qoǵamnyń irgetasy, — dedi Aıda Balaeva.
Onyń aıtýynsha, Konstıtýtsııada neke men otbasyny, ana men ákeni, balalardy qorǵaý qaǵıdaty bekitilgen. Osyǵan baılanysty memlekettik organdarmen birlesip, zańnamany, sonyń ishinde «Neke jáne otbasy týraly» kodeksti jetildirý boıynsha usynystar pysyqtalýda.
— Memlekettik konfessııalyq qatynastardy damytý mańyzdy baǵyttardyń biri bolyp qala beredi. «Dinı qyzmet jáne dinı birlestikter týraly» zańǵa ózgerister engizilmek. Bul ózgerister ar-ojdan jáne din bostandyǵy, azamattardyń quqyqtaryn jáne qoǵamdyq qaýipsizdikti qorǵaý arasyndaǵy tepe-teńdikti qamtamasyz etýge, sonymen birge memlekettiń jáne bilim berý júıesiniń zaıyrly sıpatyn saqtaýǵa baǵyttalǵan. Memlekettik rámizderdi paıdalaný máselelerine de erekshe kóńil bólinedi. Mınıstrlik normatıvtik bazany jańartý jumystaryn júrgizip jatyr. Sondaı-aq memlekettik rámizderdi patrıotızm men azamattyq biregeılikti nyǵaıtýdyń mańyzdy quraly retinde nasıhattaý jumysy jalǵasady, — dedi ol.
Vıtse-premerdiń atap ótýinshe, azamattyq belsendilikti damytý jáne volonterlik qozǵalysty qoldaý — mańyzdy baǵyttardyń biri. Volonterlik eńbekti baǵalaýdyń qosymsha tetikteri qarastyrylyp jatyr. Atap aıtqanda, eriktilerdiń eńbegi «Shapaǵat» medalimen marapattaý kezinde, sondaı-aq memlekettik qyzmetke ornalasý men oqý oryndaryna túsý barysynda eskeriletin bolady.
— Sonymen qatar konstıtýtsııalyq ózgeristerge saı úkimettik emes uıymdar salasyndaǵy zańnamany jetildirý jumystary da jalǵasady. Úkimettik emes uıymdar salasy da jańasha sıpat almaq. Memleket basshysy tapsyrmasyna sáıkes ázirlengen zań jobasy úkimettik emes uıymdardyń quqyqtyq mártebesin naqty aıqyndap, olardyń qyzmetiniń negizgi qaǵıdattaryn bekitedi. Bul qujatta ózin ózi basqarý, táýelsizdik, ashyqtyq jáne eseptilik sııaqty mańyzdy qundylyqtar zańnamalyq turǵydan aıqyn kórinis tabady, — dedi Aıda Balaeva.
Aıta keteıik, Úkimet jańa Konstıtýtsııa normalaryn júzege asyrý joldaryn talqylap jatyr.
