Eriktiler qoǵamdaǵy senim men yntymaqty nyǵaıtý arqyly mańyzdy mıssııa atqaryp keledi — Prezıdent
ASTANA. KAZINFORM — Prezıdent Qasym-Jomart Toqaevtyń Birikken Ulttar Uıymy Bas Assambleıasynyń ornyqty damý maqsattaryna oraı Halyqaralyq eriktiler jylyn jarııalaýǵa arnalǵan sessııasyna joldaǵan úndeýi jarııalandy. Bul týraly Aqordanyń baspasóz qyzmeti habarlady.
Memleket basshysy qazirgideı almaǵaıyp zamanda eriktiler adam ómirin saqtaý, qıyndyqqa dýshar bolǵan jandarǵa járdemdesý, qoǵamdaǵy senim men yntymaqty nyǵaıtý arqyly asa mańyzdy mıssııa atqaryp kele jatqanyn aıtty.
— Joǵary mártebeli! Qurmetti delegattar! Ornyqty damý maqsattaryna saı Halyqaralyq eriktiler jylyn jarııalaýǵa arnalǵan alqaly jıynda sóz sóıleý — men úshin zor mártebe. Bul aıtýly ýaqıǵa eriktilerdiń rólin kúsheıtýge, olardyń ulttyq jáne jahandyq progreske qosatyn úlesin eseleýge baǵyttalǵan ortaq umtylysymyzdy kórsetedi. Qazaqstan halyqaralyq seriktestermen tyǵyz yntymaqtastyq jasaı otyryp, osy bastamany kóterdi. Eriktiler qozǵalysy Ornyqty damý maqsattaryna jetý jolyndaǵy azamattyq belsendilik pen progreske yqpal etetin izgi amaldyń jasampazdyq qýatyna aınalaryna kámil senemiz. Qazirgideı almaǵaıyp zamanda eriktiler adam ómirin saqtaý, qıyndyqqa dýshar bolǵan jandarǵa járdemdesý, qoǵamdaǵy senim men yntymaqty nyǵaıtý arqyly asa mańyzdy mıssııa atqaryp keledi. BUU Eriktiler baǵdarlamasy dúnıe júziniń ár qıyrynda qyzmet etedi. Álemniń túkpir-túkpirindegi adamdardy bir maqsatqa jumyldyrady. Jer-jahandaǵy mıllıondaǵan adam Uıymnan bólek te volonterlik qyzmetke atsalysady, — dedi Toqaev.
Aıta keteıik, búgin — eriktiler kúni. Osyǵan deıin QR Premer-mınıstriniń orynbasary – mádenıet jáne aqparat mınıstri Aıda Balaeva eriktilerdi merekesimen quttyqtady.
Sonymen qatar Astanada «Jyl volonteri» halyqaralyq syılyǵy men «Igi ister marafonynyń» 70 laýreaty marapattaldy. «Jyl volonteri» syılyǵy Memleket basshysynyń bastamasymen 2020 jyldan beri jyl saıyn tapsyrylyp keledi. Osy ýaqytqa deıin 297 volonter laýreat atandy.
Budan buryn Prezıdent Qasym-Jomart Toqaev «Altyn sapa» jáne «Paryz» baıqaýlaryna qatysqan kásipkerlerdiń barlyǵyna alǵys aıtyp, laýreattardy marapattaǵanyn jazǵan edik.