Eriktiler qazaqstandyqtardy «Móldir bulaq» ekologııalyq aktsııasyn qoldaýǵa shaqyrdy
ASTANA. KAZINFORM – Sý resýrstary jáne ırrıgatsııa mınıstrliginiń bastamasymen jáne Jambyl oblysy ákimdiginiń qoldaýymen sý salasyndaǵy alǵashqy eriktiler qozǵalysy – «Bolashaqtyń qaınary» quryldy. Onyń quramyna Taraz qalasyndaǵy Qazaq ulttyq sý sharýashylyǵy jáne ırrıgatsııa ýnıversıtetiniń stýdentteri endi. Osyndaı eriktiler toptaryn elimizdiń basqa óńirlerinde de qurý josparlanyp otyr.
Qozǵalystyń eriktileri «Móldir bulaq» ekologııalyq aktsııasyna qatysyp, qazaqstandyqtardy Memleket basshysynyń «Taza Qazaqstan» bastamasy aıasynda uıymdastyrylǵan bulaqtardy tazalaý naýqanyn qoldaýǵa shaqyrdy.
«Biz - «Bolashaqtyń qaınary» eriktiler toby, búgin Sý resýrstary jáne ırrıgatsııa mınıstrliginiń bastamasymen ótken «Móldir bulaq» aktsııasyna qatystyq. Sý - tirshiliktiń bastaýy. Ár bulaqtyń tazalyǵy - bizdiń ortaq jaýapkershiligimiz. Biz búgin tek tabıǵatty qorǵap qana qoımaı, qoǵamǵa úlgi bolýǵa tyrystyq. Endi osy ıgi isti jalǵastyrý úshin estafetany elimizdiń barlyq óńirindegi eriktilerge joldaımyz. Birge áreket etsek, úlken ózgeris jasaı alamyz!», – dedi Qazaq ulttyq sý sharýashylyǵy jáne ırrıgatsııa ýnıversıtetiniń 3-kýrs stýdentteri Dıas Ábilhan jáne Aıdana Muqajanova.
«Bolashaqtyń qaınary» qozǵalysy tek ekologııalyq aktsııalarǵa qatysýmen shektelmeıdi. Belsendi jastar sý únemdeýdi nasıhattaý jáne qoǵamda ekologııalyq mádenıetti qalyptastyrý baǵytyndaǵy júıeli jumystarǵa úles qosýdy josparlap otyr.
«Móldir bulaq» ekologııalyq aktsııasy Shymkent qalasynda, Almaty, Jambyl, Qyzylorda, Túrkistan jáne Jetisý oblystarynda ótti. Oǵan shamamen 3,8 myń adam qatysty. Aktsııa aıasynda bulaqtardyń kózin ashý jáne qalpyna keltirý, sondaı-aq aınalasyndaǵy aýmaqtardy tazalaý jáne abattandyrý jumystary júrgizildi. Qoqys jınalyp, kóshetter otyrǵyzyldy.
Іs-sharalarǵa Sý resýrstary jáne ırrıgatsııa mınıstrliginiń, vedomstvoǵa qaraıtyn uıymdar men komıtetterdiń mamandary, sondaı-aq júzdegen erikti men stýdent qatysty.
