Erikti túrde qaıtarylǵan aktıvter zańsyz dep tanylmaıdy
ASTANA. KAZINFORM — Senat «Qazaqstan Respýblıkasynyń keıbir zańnamalyq aktilerine Qazaqstan Respýblıkasy Konstıtýtsııalyq sotynyń sheshimderin oryndaý jáne zańsyz ıemdenilgen aktıvterdi memleketke qaıtarý máseleleri boıynsha ózgerister men tolyqtyrýlar engizý týraly» Zańdy eki oqylymda qarap, maquldady.
- Zań Memleket basshysynyń 2024 jylǵy Joldaýynda berilgen tapsyrmalardy oryndaý, sondaı-aq, Konstıtýtsııalyq Sottyń normatıvtik qaýlylaryn iske asyrý maqsatynda ázirlendi. Zańmen quqyqtyq qaıshylyqtardy joıý, memlekettik qyzmettiń tıimdiligin arttyrý, sondaı-aq sybaılas jemqorlyqqa qarsy is-qımyl, jer paıdalaný quqyqtaryn muragerlikke alýǵa qatysty ózgerister men tolyqtyrýlar boıynsha 4 kodeks pen 10 zańǵa tıisti túzetýler engiziledi. «Zańsyz ıemdenilgen aktıvterdi memleketke qaıtarý týraly» Zańǵa engiziletin túzetýler zańsyz ıemdenilgen aktıvterdi qaıtarý protsesiniń ashyqtyǵy men tıimdiligin arttyrýǵa baǵyttalǵan, - dedi Nurlan Beknazarov.
Onyń aıtýynsha, mynadaı túzetýler engiziledi:
- zańsyz ıemdenilgen aktıvterdi qaıtarý jónindegi sharalardyń nátıjelerin, olardyń memleket pen azamattardyń múddesine paıdalanylýy týraly aqparatty jarııalaý mindetin engizý;
- ulttyq ekonomıkaǵa, áleýmettik-mádenı obektilerdiń qurylysyna qarajatty ınvestıtsııalaýdy nemese áleýmettik-ekonomıkalyq damýdy kózdeıtin kelisimderge qatysty normalardy egjeı-tegjeıli reglamentteý;
- kelisimderdi jasaý nátıjesinde erikti túrde qaıtarylǵan nemese memleket kirisine berilgen aktıvterdi zańsyz dep tanylmaýdy belgileý.
- Konstıtýtsııalyq sottyń 2023 jylǵy 13 maýsymdaǵy normatıvtik qaýlysyna sáıkes «Sybaılas jemqorlyqqa qarsy is-qımyl týraly» Zańnyń 13-babynyń, 2024 jylǵy 4 jeltoqsandaǵy normatıvtik qaýlysynda «Neke (erli-zaıyptylyq) jáne otbasy týraly» Qazaqstan Respýblıkasy Kodeksiniń 37-baby 6-tarmaǵynyń, 2025 jylǵy 30 qańtardaǵy normatıvtik qaýlysyna sáıkes Jer kodeksiniń 40-baby 1-tarmaǵynyń jekelegen bóliginde normalar Konstıtýtsııaǵa sáıkes kelmeıtin bolyp tanyldy. Osyǵan baılanysty, «Sybaılas jemqorlyqqa qarsy is-qımyl týraly» zańynda memlekettik fýnktsııalardy oryndaýǵa ýákilettik berilgen adamdarǵa teńestirilgen tulǵalardyń kásipkerlikpen jáne ózge de aqy tólenentin qyzmetpen aınalysýyna jalpy tyıym salýdy alyp tastaý usynylady, - dedi senator.
Nurlan Beknazarovtyń atap ótýinshe, bul rette myna sanattarǵa qoldanystaǵy shekteýler saqtalady:
- ókilettigin kásibı turaqty negizde júzege asyratyn aýmaqtyq saılaý komıssııasynyń músheleri;
- Ulttyq banktiń, Qarjy naryǵyn retteý jáne damytý agenttigi men azamattyq avıatsııa salasyndaǵy ýákiletti uıymnyń qyzmetshileri;
- ulttyq holdıngter men ulttyq kompanııalardyń basqarýshylary.
- Sonymen qatar, Konstıtýtsııalyq sottyń qaýlylaryna sáıkes «Neke (erli-zaıyptylyq) jáne otbasy týraly» kodeksine engizilgen túzetýler arnaýly salyq rejımderin qoldanatyn nemese elimizdiń sheginen tys jerge turaqty turýǵa ketken ata-analardyń kámeletke tolmaǵan balalaryna qatysty alımentterdi turaqty aqsha somasynda ustap qalý tártibin naqtylaıdy. Jer kodeksine engiziletin ózgerister jer paıdalaný quqyǵyn muraǵa qaldyrý tártibin naqtylap, zań boıynsha da, ósıet boıynsha da muraǵa qaldyrý rásimderiniń birkelkiligin qamtamasyz etedi, - dedi ol.
Senatordyń aıtýynsha, memlekettik qyzmettiń tartymdylyǵyn arttyrý jáne ony jetildirýge baılanysty baǵyttalǵan túzetýler memlekettik qyzmetshiler jáne olarǵa teńestirilgen adamdardyń 5 paıyzdan aspaıtyn kommertsııalyq uıymdardyń jaı aktsııalaryn senimgerlik basqarýǵa berý mindeti jáne baǵaly qaǵazdar naryǵynda ǵana satyp alýmen shekteıtin normalar alyp tastaldy. Bul halyqtyq IPO-nyń damýyna, qosymsha shyǵyndardy boldyrmaýǵa, atalǵan aktıvterdi azamattyq-quqyqtyq mámileler boıynsha satyp alýǵa, sondaı-aq muraǵa berýge bolatyndyǵyna baılanysty.
- Sonymen qatar, tsıfrlyq aktıvter Salyq kodeksine sáıkes tabys ákeletin jáne salyq deklaratsııasynda kórsetiletin múlikke jatqyzylǵandyqtan zańda tsıfrlyq aktıvterdi senimgerlik basqarýǵa bermeı satyp alý múmkindigi kózdelgen. «Sybaılas jemqorlyqqa qarsy is-qımyl týraly» Zańǵa memlekettik qyzmetshilerdiń senimgerlik basqarýǵa berilgen múlikten kiris alý quqyǵyn kózdeıtin norma engiziledi, - dedi Nurlan Beknazarov.