Erikti qonys aýdarý: memleket qandaı shyǵyndardy óteıdi
ASTANA. KAZINFORM – Kadr tapshylyǵy bar óńirlerge erikti túrde qonys aýdarý baǵdarlamasy jańartylyp, memlekettik qoldaý kúsheıdi. Baǵdarlamadaǵy negizgi ózgerister týraly QR Eńbek jáne halyqty áleýmettik qorǵaý mınıstrligi Kóshi-qon komıteti basqarmasynyń basshysy Dına Temirbolat Jibek Joly telearnasynyń «Búgin Live» baǵdarlamasynda aıtty.
Baǵdarlama 2017 jyldan beri jumys isteıdi. Osy ýaqyt ishinde oǵan 73,9 myń adam qatysyp, 31 myńy turaqty jumyspen qamtylǵan. Bıyldan bastap qonys aýdarýshylarǵa turǵyn úı satyp alýǵa 7 mln teńgege deıin qarjy berý tetigi engizildi.
– Baǵdarlama aıasynda qonys aýdarýshylarǵa kóshý shyǵyndaryna sýbsıdııa beriledi, turǵyn úıdi jaldaý men kommýnaldyq qyzmet aqysy óteledi. Sondaı-aq jumysqa ornalasýǵa qoldaý kórsetilip, jańa óńirge kóshpeı turyp-aq bos jumys oryndaryn tańdaý múmkindigi qarastyrylǵan, – dedi Dına Temirbolat.
Sonymen qatar bıyl baǵdarlamaǵa qatysýshylar sanaty keńeıtildi. Endi oǵan jumyssyz azamattarmen qatar eńbek naryǵynda suranysqa ıe mamandar, sondaı-aq sharýa jáne fermer qojalyqtarynyń ókilderi de qatysa alady.
– Qonys aýdaratyn óńirlerge Úkimet aıqyndaǵan segiz oblys kiredi. Olar – Soltústik Qazaqstan, Shyǵys Qazaqstan, Qostanaı, Abaı, Ulytaý, Qaraǵandy jáne Aqmola oblystary. Baǵdarlamaǵa qatysý úshin basty talap – eńbekke qabiletti bolý. Qazir bilim, densaýlyq saqtaý, ınjenerııa, zerthana isi, aýyl sharýashylyǵy jáne ónerkásip salasynyń mamandaryna suranys joǵary, – dedi Dına Temirbolat.
Baǵdarlama tolyq tsıfrlandyrylǵan. Ótinish berý, suranysqa ıe mamandyqtar men bos jumys oryndary týraly aqparattyń barlyǵy migration.enbek.kz portalynda qoljetimdi.
Mınıstrlik málimetinshe, jyl basynan beri baǵdarlamaǵa qatysqan 6763 adamnyń tek 61-i ǵana soltústik óńirlerde turaqty qalýdan bas tartqan.
Aıta keteıik, Almatyda jumystan aıyrylýyna baılanysty tólem alatyndar sany 60%-ǵa kóbeıgen.
