Erkinǵalı Búrkitalın: Aralas jekpe-jekten kásipqoı mansabymdy jalǵastyramyn
NAGOıA. KAZINFORM — Qazaqstandyq sportshy Erkinǵalı Búrkitalın Japonııada ótip jatqan jazǵy Azııa oıyndarynda aralas jekpe-jekten top jardy. Faıter aıqastan keıin Kazinform tilshisine shaǵyn suhbat berip, jarystan keıingi sezimi jáne aldaǵy kásipqoı mansaby týraly aıtyp berdi.
Erkinǵalı Búrkitalın qoldaý kórsetken qazaqstandyqtarǵa alǵys aıtty.
— Jekpe-jek oıdaǵydaı ótti. Otandastarymyzdyń qoldaýyn sezindim, barshańyzǵa raqmet aıtqym keledi. Aralas jekpe-jekten alǵashqy Azııa chempıony atanǵan qazaqstandyq bolǵanym úshin qýanyshtymyn, — dedi ol.
Qazaqstandyq sportshy aralas jekpe-jekti Olımpıada baǵdarlamasynda kórgisi keletinin jasyrmady.
— Bul sport alǵash ret Azııa oıyndary baǵdarlamasyna kirip otyr. Bolashaqta Olımpıada oıyndary baǵdarlamasyna kirip jatsa, el namysyn qorǵaýǵa daıynmyn, — dedi ol.
Erkinǵalı Búrkitalın aldaǵy ýaqytta kásipqoı mansabyn jalǵastyratynyn aıtty.
— Qazirge naqty jospar jasaǵan joqpyn. Aldymen elge qaıtyp, bapkerimmen aqyldasamyn. Kásipqoı lıgada óner kórsetýimdi jalǵastyramyn. Qazirgi ýaqytta Alash Pride lıgasymen kelisimshartym bar. Sheteldik lıgalardyń usynysyna ashyqpyn. Ózim japondyq Rizin lıgasyna qyzyǵýshylyǵym bar, — dep qorytyndylady Azıada chempıony.
Eske salaıyq, Erkinǵalı Búrkitalın erler arasynda (77kg) MMA sportynan dástúrli stıl boıynsha jarys jolyna shyǵyp, aqtyq synda Bahreın sportshysy Muhammed Nabıevti 3:0 esebimen qapy qaldyrdy.
Sonymen qatar, Bella Samasheva karateden Azııa oıyndarynyń qola júldegeri atandy.
