Erkin Tuqymov: Túrki memleketteri uıymyn saıasılandyrmaýymyz kerek

QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Erkin Tuqymov túrki memleketteri uıymyn saıasılandyrmaýǵa shaqyrdy. Onyń pikirinshe, elder ekonomıka, ınvestıtsııa boıynsha damýy kerek, dep habarlaıdy QazAqparat tilshisi

«Geosaıası turaqsyzdyq, qarama-qaıshylyqtar bolyp jatqanda bizge problema qajet emes. Bizge ekonomıkany damytyp, ınvestıtsııalar tartý qajet. Búginde túrki memleketteri uıymynyń zertteý ortalyǵyn qurý, kadrlardy daıarlaý týraly jaqsy usynystar aıtylyp jatyr. Biz doktor Ilmazben sóılesken kezde, ol naqty jobalardan bastaý kerek ekenin aıtty. Túrki memleketteri uıymy bireýge qarsy baǵyt ustanbaıdy, bizdiń uıymdy saıasılandyrmaý kerek. Biz pikirtalasty pragmatıkalyq jáne bizdiń múddemizge saı júrgizip jatyrmyz», - dedi Erkin Tuqymov elordada ótip jatqan túrki memleketteri uıymyna múshe elder ókilderimen kezdesýde.

Sondaı-aq spıker túrki memleketteri uıymynyń saraptamalyq qoǵamdastyǵy yntymaqtastyqty damytýǵa járdemdesýde sheshýshi ról atqaratynyn aıtty.

«Biz kúsh-jigerimizdi biriktirý úshin elimizdiń ǵylymı-saraptamalyq toptarynyń ózara is-qımylyn keńeıtý kerek. Dál osy saraptamalyq deńgeıde bar problemany túsinip, ony sheshýdiń tıimdi tásilderin ázirleý qajet. Saýda-ekonomıkalyq, kóliktik-logıstıkalyq, ınfraqurylymdyq sıpattaǵy zertteý baǵyttaryn damytý qajet. Myqty saraptamalyq dıalog túrki memleketteri uıymyna múshe elderdiń ekonomıkasyn damytýǵa yqpal etetinine senimdimin», - deıdi ınstıtýt basshysy.

Buǵan deıin habarlaǵanymyzdaı, elordada túrki memleketteri uıymyna múshe jáne baıqaýshy memleketterdiń resmı syrtqy saıası zertteýler ortalyqtarynyń 9 kezdesýi ótip jatyr.