Erkin kúresten Qazaqstan quramasy álem chempıonatyn ekinshi orynmen aıaqtady
ASTANA. KAZINFORM – Bolgarııanyń Samokov qalasynda ótip jatqan 20 jasqa deıingiler arasynda álem chempıonatynda erkin kúresten Qazaqstan quramasy jalpy komandalyq esepte ekinshi oryn aldy.
Dúbirli dodada qazaqstandyq balýandar 1 altyn, 1 kúmis, 3 qola medal aldy.
El quramasynan Edige Qasymbek (125 keli) chempıon atansa, Kamıl Kýrýglıev (92 keli) kúmiske qol jetkizdi. Al Nurdanat Aıtanov (57 keli), Dosjan Kulǵaıyp (74 keli) jáne Samır Dýrsýnov (97 keli) úzdik úshtikti túıindedi.
17-24 tamyz aralyǵynda ótip jatqan bedeldi básekede endi áıelder kúresinen júldeler sarapqa salynsa, odan keıin grek-rım kúresiniń balýandary bozkilemge shyǵady.
Dúnıejúzilik doda 1969 jyldan beri turaqty túrde ótkizilip keledi. Qazirge deıin qazaqstandyq balýandar 10 altyn, 27 kúmis, 39 qola medal aldy.
Byltyr Ispanııanyń Pontevedre qalasynda ótken álem chempıonatynda el quramasy 2 altyn, 1 kúmis, 4 qola júldemen medaldar kestesinde tórtinshi orynǵa turaqtady.
