Erkin kúresten Álem chempıony Nurqoja Qaıpanov Petropavlǵa oraldy
PETROPAVL. KAZINFORM — Soltústikqazaqstandyqtar erkin kúresten Álem chempıony Nurqoja Qaıpanovty temirjol vokzalynan qarsy aldy. Nurqoja Qaıpanov Albanııa astanasy Tıranada kúres túrlerinen olımpıadalyq emes salmaqtarda ótken álem chempıonatynda altyn júldeni jeńip aldy. Ol — el tarıhynda erkin kúresten Álem chempıony bolǵan ekinshi balýan.
«Eńbek pen sheksiz shydamdylyq nátıjesin bermeı qoımaıdy. Nurqoja Olımpıada medalin taqqysy kelgen, ol maqsatyna da jetemiz dep oılaımyn, alda áli ýaqyt bar. 2019 jyly Álem chempıonatynyń kúmis júldegeri boldy. Odan keıin qandaı da bir sebeptermen aıtarlyqtaı joly bolmap edi. Eń bastysy ózine degen senimin joǵaltpady, erik-jigerin jınap, bul joly odan da jaqsy nátıjege jetip otyr. Óte eńbekqor. Bizdiń mektep-ınternatqa 7-synypqa kelgen edi. Kózi «janyp» turǵan bala. Bul jetistigi taza eńbektiń nátıjesi. Ata-anasyna da alǵys aıtqym keledi. Sportta, qaıda bolmasyn tárbıeniń róli zor», — deıdi jattyqtyrýshysy Aıan Beısenbaev.
Chempıondy temirjol vokzalynan qarsy alýǵa ardager sportshylar, áriptesteri, týǵan-týystary men dostary keldi.
«Búgin Álem chempıony, eki dúrkin Azııa chempıony, Álem chempıonatynyń kúmis júldegeri Nurqoja Qaıpanovty qarsy alyp jatyrmyz. Kópten kútken medal. Erkin kúresten Qazaqtannyń ekinshi altyn medali. Buǵan deıin tarıhta bolmaǵan. Álem chempıonatyna jaqsy daıyndaldy, aldynda 74 kg — olımpıadalyq salmaqta bolǵan, osy joly 70 kg salmaqta kúresti. Dıetologpen jumys istedi, densaýlyǵyn baqylaýda ustady. Qazir babynda, osy joly jaqsy kúresti. Aqtyq synda japondyq sportshymen kezdesip, 6 da 4 esebimen jeńdi», — deıdi Soltústik Qazaqstan oblystyq olımpıada rezerviniń mamandandyrylǵan mektep-ınternat-kolledjiniń erkin kúresten aǵa jattyqtyrýshysy Orynbek Balaǵanov.
26 jastaǵy Nurqoja Qaıpanov búginde kelesi týrnırlerge daıyndyqty bastap ketken. Ótken týrnırdiń de ońaı bolmaǵanyn aıtady.
«Taktıkalyq turǵyda bir aı aldyn ala daıyndyq jasadyq. Jalpy Álem chempıonatyna altynshy ret qatystym. Bul álemdik deńgeıdegi sońǵy jarys emes. Alda áli jarystar bar. Máselen, Reseıde ótetin Ivan ıArygın atyndaǵy týrnırge barmaq nıettemin. Ol da Álem chempıonaty sııaqty deńgeıde ótedi. Qazir oǵan daıyndyqty bastap kettik. Olımpıada oıyndaryna qatysý josparda bar», — deıdi chempıon.
Buǵan deıin SQO-da ákimdik jalǵyzilikti anaǵa kúrdeli jóndeýdi qajet etetin baspana bergenin jazǵan edik.